İlham Əliyev niyə daha futbola getmir?

Dövlət başçısı İlham Əliyevlə veteran futbolçu Oqtay Abdullayev arasında səmimi dialoqu yəqin bütün futbolsevərlər xatırlayır.

Oqtay Abdullayev: Futbola gəlmək lazımdır.

İlham Əliyev: Mən gələrdim, sonra uduzarlar, pis olar...

Prezident bu sözləri elə-belə demirdi. 

10 il əvvəl Bakıda keçirilən 17 yaşadək futbolçular arasında Avropa çempionatının açılış matçına dövlət başçısı ailəsi, nəvələri ilə təşrif buyurmuşdu. 

Amma futbolçularımız ilk 23 dəqiqədə biabırçı formada uduzmağımız üçün hər şey etdi. 

Gələn il final mərhələsi Azərbaycan və Özbəkistanda keçiriləcək U20 dünya çempionatında da ölkə başçısı yəqin ki, stadiona ən azı 1 dəfə gələcək. 

Ruy Jorjenin tələsik təyinatı da bəlkə də onun önündə növbəti rəzalətin qarşısını almaq məqsədi daşıyır. 

Amma təəssüf ki, indiki U-20 millimizin futbolçularının potensialı 10 il əvvəlki U17-nin futbolçularının potensialından yüksək deyil...

Bu səbəbdən AFFA paralel olaraq başqa addımlar atmalıdır. Məsələn, gələn mövsüm Premyer Liqa klublarında 20 yaşadək ən azı 3-4 futbolçu olmalı, onlardan da heç olmasa 1-2-si əsas heyətdə oynamalıdı. 

2016-cı ildə Bakıda keçirilən Avropa çempionatında heyətimizdə çoxlu türk futbolçu vardı. Onların əksəriyyəti peşəkar futbolçu ola bilmədi. Elə o heyətdəki yerli oyunçularımızın da...

Buna görə də, xaricdə yaşayıb-yaradan əslən azərbaycanlı gənc futbolçuların cəlb edilməsi planı da nə dərəcədə uğurlu ola bilər, bilmirəm. 

Həmçinin Əvəzedicilər liqasının ləğvinin tərəfdarı olsam da, bu Dünya çempionatına görə liqanın ömrünün ən azı 1 il daha uzadılması məntiqli görünür.

Anar Şabanoğlu,

İdman eksperti