Ermənistan iqtisadiyyatına CİDDİ ZƏRBƏ: Bu sahələrdə problemlər yaranacaq...

Ermənistanın iqtisadiyyat naziri Gevorq Papoyan brifinqdə çıxışı zamanı bildirib ki, əgər İrana qarşı müharibə uzanarsa, Ermənistan iqtisadiyyatı ciddi şəkildə əziyyət çəkəcək. 

O qeyd edib ki, xüsusən bəzi malların bahalaşması halında xərclər indi də müşahidə olunur: 

“Ermənistan bəzi xammal növlərini İrandan alır və bu halda qiymət artımı riski də var. Mümkün müharibənin uzanması Ermənistanın ticarət, enerji və logistika sahələrində ciddi problemlər yarada bilər”. 

Liberal İqtisadçılar Mərkəzinin sədri Akif Nəsirli bu barədə TodayPress TV-yə danışarkən bildirib ki, Ermənistan iqtisadiyyatı İran ilə həm ticarət, həm də logistika baxımından bağlı olduğu üçün mümkün müharibənin uzanması bir neçə sahəyə ciddi təsir göstərə bilər.   

Onun sözlərinə görə, əvvəlcə ticarət əlaqələri zərər çəkə bilər: 

“İran Ermənistan üçün əsas idxal və ixrac tərəfdaşlarından biridir. Xüsusilə yanacaq, qaz, tikinti materialları və bəzi ərzaq məhsulları Ermənistana İran üzərindən çatdırılır. Müharibə səbəbilə bu tədarük zənciri pozularsa, qiymətlər arta və bazarda qıtlıq yarana bilər”.  

Ekspert hesab edir ki, nəqliyyat və tranzit imkanları da ciddi zərbə ala bilər. Ermənistanın xarici dünyaya çıxışında İran mühüm marşrutlardan biridir. Sərhədlərdə təhlükəsizlik riskləri və ya bağlanmalar logistikanı çətinləşdirər, bu da həm idxalı, həm də ixracı zəiflədər.   

O, həmçinin enerji sahəsinin də təsirlənə biləcəyini vurğulayıb. 

“Ermənistan İran qazından istifadə edir və bu enerji əməkdaşlığı pozularsa, alternativ mənbələr daha baha başa gələ bilər. Bu isə ümumi iqtisadi xərcləri artırar. Turizm və xidmət sektoru da zərər görə bilər. Regionda təhlükəsizlik risklərinin artması turist axınını azaldır, investorlarda isə qeyri-müəyyənlik yaradır. Bu isə iqtisadi aktivliyin zəifləməsinə səbəb olur. Bundan əlavə, ümumi qeyri-müəyyənlik və risklər investisiya mühitinə mənfi təsir edir. Xarici investorlar belə vəziyyətlərdə daha ehtiyatlı davranır, yeni layihələr gecikir və ya dayandırılır”, - deyə A.Nəsirli izah edib. 

İqtisadçı sonda bildirib ki, belə bir münaqişənin uzanması Ermənistan iqtisadiyyatında qiymət artımı, ticarət azalması, enerji xərclərinin yüksəlməsi və ümumi iqtisadi yavaşlama ilə nəticələnə bilər.   

Aysel Mətləb

TodayPress TV