Erməni mediasının təhlili - İrəvanda ən həlledici fikir sahibi Prezident Əliyevdir

Prezident İlham Əliyevin Zəngilanda, Kovsağan kəndində sakinlərlə görüşü zamanı səsləndirdiyi fikirlər Ermənistan mediasında geniş rezonans doğurdu.

Çıxışda Azərbaycana qarşı nifrət üzərində siyasi fəaliyyət quran dairələr, Avropa müşahidəçilərinin bölgədəki rolu, “Ermənistanı bizdən qorumağa ehtiyac yoxdur” və “Avropa "müşahidəçi"lərinin bir güllə ilə dabanı parlayar” kimi mesajlar erməni informasiya məkanında həm siyasi, həm də emosional reaksiyalarla qarşılandı. Bu reaksiyalar Ermənistan daxilində davam edən siyasi ziddiyyətləri, revanşist yanaşmaların hələ də təsirini və yeni regional reallıqlarla barışmaqda yaşanan çətinlikləri ifşa edir.

Media reaksiyaları:

Ən geniş və nisbətən təmkinli yanaşma bu platformada müşahidə olunur. Material “Ermənistanda bəzi siyasi qüvvələr Azərbaycana nifrət hissi ilə yaşayırlar” başlığı ilə təqdim edilib və Prezidentin fikirləri “ittihamların yeni mərhələsi” kimi şərh olunub.

Yazıda müxalif deputat Tiqran Abrahamyanın cavabına da yer verilib. O, “Əgər bu təslimçilikdirsə, biz bunu qəbul etmirik” deyə mövqe bildirib.

Bu yanaşma göstərir ki, 168.am sadəcə informasiyanı çatdırmaqla kifayətlənməyib, çıxışı daxili auditoriya üçün siyasi xəbərdarlıq kimi təqdim etməyə çalışıb. Ermənistan mediasında Azərbaycanın sərt və prinsipial mövqeyinin tez-tez “təhlükə” kontekstində təqdim olunması yeni hal deyil.

Sputnik Armenia

Ən sərt ton məhz burada hiss olundu. Materialda Prezidentin Ermənistana qarşı "ittihamlar" səsləndirdiyi və Avropa müşahidəçilərinə xəbərdarlıq etdiyi vurğulanırdı. Xüsusilə “düşmən bir dəfə atəş açsa, müşahidəçilər qaçacaq” fikri ön plana çıxarılmışdı.

Sputnik-in təqdimat tərzi onun regional informasiya xəttinə uyğun idi. Burada təkcə Azərbaycan-Ermənistan münasibətləri deyil, həm də Qərb strukturlarına etimad məsələsi qabardılırdı. Bu isə Ermənistanın informasiya məkanında xarici təsir mərkəzlərinin hələ də ciddi rol oynadığını göstərir.

News.am

Bu platforma mövzunu “Ermənistanı bizdən qorumağa ehtiyac yoxdur” başlığı ilə təqdim etdi. Çıxışda “Biz Ermənistanı məhv etmək və ya onun müstəqilliyini əlindən almaq niyyətində olmamışıq” fikrinə də yer verilsə də, ümumi təqdimatda daha çox təhlükə və gərginlik fonu yaradılmışdı.

Başlığın seçimi diqqət çəkir. Prezidentin daha geniş siyasi mesajı qismən kontekstdən çıxarılaraq təqdim olunmuş, bununla da erməni auditoriyasında narahatlıq hissinin gücləndirilməsinə çalışılıb.

"Aravot", "Lragir" və digər platformalar...

Bu media qurumları çıxışı əsasən “sərt ritorika”, “təzyiq mesajı” və “provokativ bəyanatlar” çərçivəsində təqdim etdilər. Xüsusilə “nifrət”, “psixoloji təsir” və bəzi ifadələrin emosional tərəfi müzakirələrin mərkəzinə çevrildi.

Erməni mediasında yaranan reaksiyaları üç istiqamətdə dəyərləndirmək olar.

Birincisi, bu, müəyyən mənada psixoloji müdafiə reaksiyası idi. Bunu hamımız bilirik. Prezidentin “nifrət üzərində siyasət”lə bağlı fikirləri Ermənistan cəmiyyətində illərdir formalaşdırılmış qurbanlıq və təhlükə narrativlərinə toxunduğu üçün emosional cavab doğurdu.

İkincisi, məsələ dərhal daxili siyasi mübarizənin alətinə çevrildi. Müxalifət bu çıxışdan istifadə edərək Baş nazir Nikol Paşinyanın siyasətini hədəf aldı və revanşist elektorata mesaj verməyə çalışdı. Bu da Ermənistan daxilində siyasi parçalanmanın hələ də dərin olduğunu göstərir.

Üçüncüsü isə, çıxışda səslənən bəzi mesajlar Ermənistan cəmiyyətində yeni regional reallıqlarla bağlı narahatlıqları bir daha üzə çıxardı. Xüsusilə “Ermənistanı bizdən qorumağa ehtiyac yoxdur” fikri informasiya məkanında ən çox müzakirə olunan tezislərdən birinə çevrildi.

Zəngilanda səsləndirilən mesajlar Ermənistan mediasında həm emosional, həm də siyasi rezonans yaratdı. Reaksiyaların tonundan görünür ki, Azərbaycanın sərgilədiyi özünəinamlı və prinsipial siyasi xətt Ermənistan üçün hələ də həssas mövzulardan biridir. Qorxurlar... Bu reallıqdır.  Ermənistan mediası bunu daha çox təhlükə kontekstində təqdim etməyə çalışsa da, ortaya çıxan mənzərə başqa bir reallığı da göstərir — regionda formalaşmış yeni siyasi düzənlə barışmaq prosesi hələ tam başa çatmayıb.

Bu gün Ermənistan cəmiyyətinin qarşısında faktiki olaraq iki seçim dayanır: ya keçmişin revanşist düşüncəsinə bağlı qalmaq, ya da yaranmış yeni geosiyasi reallıqları qəbul edib daha praqmatik yanaşmaya keçmək. Media reaksiyaları göstərir ki, hər iki xətt hələ də mübarizə aparır, amma dəyişən regional şərait ikinci seçimi getdikcə daha aktual edir. 

Jalə Rövşən