Mədəniyyət Nazirliyi qeyri-hökumət təşkilatları üçün elan olunmuş müsabiqələrlə bağlı məlumat yaydı
Azərbaycan Respublikasının Mədəniyyət Nazirliyi tərəfindən 21 iyul – 11 avqust 2025-ci il tarixlərində qeyri-hökumət təşkilatları üçün elan olunmuş “Mədəniyyət sahələri üzrə ümumi qrant müsabiqəsi” və “Mədəni və yaradıcı sənayelər üzrə xüsusi qrant müsabiqəsi” çərçivəsində təqdim edilmiş layihə təkliflərinin ilkin seçimi və qiymətləndirilməsi başa çatıb.
TodayPress TV xəbər verir ki, bu barədə Mədəniyyət Nazirliyi məlumat yayıb.
"Bildiririk ki, ekspertiza nəticəsində müsabiqə şərtlərinə cavab verən layihələrin siyahısı müəyyənləşdirilib.
Növbəti mərhələdə qeyri-hökumət təşkilatlarının iştirakı ilə açıq təqdimat sessiyaları keçiriləcəkdir. Təqdimat sessiyalarının 17-21 oktyabr 2025-ci il tarixlərində keçirilməsi nəzərdə tutulmuşdur. Sessiyalarda iştirakla bağlı bildirişlər adı ilkin seçim siyahısına daxil edilmiş təşkilatların elektron poçt ünvanlarına göndəriləcəkdir. Sessiyalarda təşkilat nümayəndələri layihə təqdimatları ilə çıxış edəcəklər. Açıq təqdimatlar zamanı müvafiq sosial şəbəkələr vasitəsilə canlı yayım təşkil ediləcəkdir.
Təqdimatlar layihələrin məqsədləri, gözlənilən nəticələri, icra mexanizmləri və s. kimi ətraflı məlumatları əhatə etməlidir. Hər təqdimata 5-15 dəqiqə vaxt ayrılacaqdır.
Qalib layihələr açıq təqdimat sessiyalarının nəticələrinə əsasən Müsabiqə Komissiyası tərəfindən müəyyən ediləcəkdir.
Mədəniyyət Nazirliyi müsabiqədə iştirak edən bütün qeyri-hökumət təşkilatlarına təşəkkür edir, ilkin mərhələni uğurla keçmiş təşkilatlara isə növbəti mərhələdə uğurlar arzulayır."
