2026-cı ilin dəbi: Moda dünyası belə dəyişəcək – VİDEO

Hər ilin öz dəbi var. Moda dünyası daim dəyişir və hər dövrün, ilin özünəməxsus trendləri, rəngləri, geyim tərzləri olur. 

Modelyer-dizayner Arzu Yılmaz hesab edir ki, hər bir insan öz zövqünə uyğun geyimi illər keçsə də, dəbləşdirə bilər: 

"İnsanlar zövqlə geyinməlidirlər. Çünki insan zövqlə geyindikdə, dəb və zövq bir araya gələndə ortaya daha gözəl görüntü çıxır. Elə insanlar var ki, dəbə uyğun geyinirlər, amma bu, onlara yaraşmadığı üçün gülünc görünə bilər. Mənim fikrimcə, hər bir insan öz bədən quruluşunu və geyim tərzini tanısa, zövqlə geyinsə, bu, onu özü-özlüyündə dəbli edər və geyindiyi paltarı da dəbləşdirər".

Modelyer-dizayner Arzu Yılmaz bu il daha çox dəbdə olacaq geyim rənglərindən də söz açıb: 

"Əsasən təbii rənglərə üstünlük veriləcək. Bu rənglərə açıq bej, açıq boz, su yaşılı, zeytun yaşılı və təbii torpaq çalarları daxildir. Bununla yanaşı, bildiyimiz kimi bu il At ili olduğuna görə al-qırmızı, narıncı və bardo kimi çılğın rənglər də daha çox dəbdə olacaq. Nəticədə isə sakit və təbii rənglərlə daha enerjili, çılğın rənglərin insanın xarakterini əks etdirən harmonik bir qarışığı ön plana çıxacaq".

10 il bundan qabaq dəbdə olan geyim bu il də trend ola biləcəyini qeyd edən modelyer hətta bəylər üçün hansı dəbli geyimlərin olacağını da bildirib.

"Kişilərimiz son illərdə həqiqətən daha zövqlə geyinirlər. Mən bunu müşahidə edirəm və bu, məni çox sevindirir. Xüsusilə bu ilin dəbinə baxanda hiss olunur ki, 90-cı illərin klassik geyim üslubu yenidən ön plana çıxır və daha çox dəbə gəlir".

Maraqlısı budur ki, insanlar geyim alarkən daha çox təkrarçılığa yol verirlər. Bəs buna səbəb nədir?  

Modelyer-dizayner Sevinc Rzayeva isə bu suala aydınlıq gətirib. O, zövqə xələl gətirən təkrarçılığın qarşısını almağın yollarını açıqlayıb. 

"Ən çox da mağazaların hazır "look"larından istifadə edən, dəbdə olan hər bir geyimin ardınca qaçıb onu almağa çalışan xanımlar təkrarçılığa yol verirlər. İnsan dəbdə olanı deyil, özünə yaraşanı və öz tərzinə uyğun olanı seçdikdə həm daha düzgün geyinir, həm də daha dəbli və fərqli görünüşə sahib olur".

Modelyer xanımların da vurğuladığı kimi, zövqümüzü dəblə formalaşdıraq, çalışaq bu il də tərzimizi və xarakterimizi əks etdirən geyimlər seçək.

Türkan İsgəndərli 

Vüsalə Nəciyeva