İsa Məsihin möcüzələr yaratdığı Vifsaida şəhərinin qalıqları tapıldı - FOTO

Stiven Notlinin rəhbərlik etdiyi arxeoloqlar qrupu İncildə bəhs edilən itkin Vifsaida şəhərini tapdıqlarını bəyan ediblər.

TodayPress TV xəbər verir ki, bu barədə "Daily Star" nəşri xəbər yayıb.

Tədqiqatçıların sözlərinə görə, İsraildəki El-Araj arxeoloji abidəsində aparılan qazıntı işləri zamanı itmiş kilsə və Müqəddəs Pyotrun evi aşkar olunub.

Tapılan məbəd İsa Məsihin möcüzələr göstərdiyi kilsənin tarixi təsvirlərinə tam uyğun gəlir. Buna görə də alimlər El-Arajın məhz İncildə adı çəkilən Vifsaida şəhəri olduğunu ehtimal edirlər. Bibliyaya əsasən, İsa bu məkanda bir neçə möcüzə göstərib: kor insanın gözlərini açıb, beş çörək və balıqla 5 000 nəfəri doyurub. Eyni zamanda, bura Andrey, Pyotr və Filip adlı apostolların vətəni hesab olunur.

Qeyd olunur ki, El-Araj ərazisində Bizans dövrünə aid böyük bir bazilika tapılıb. Alimlər bunun "Apostollar kilsəsi" olduğunu güman edirlər. Qazıntı yerində balıqçılıq alətləri ilə yanaşı, Müqəddəs Pyotrun "apostolların rəhbəri və cənnətin açarlarının qoruyucusu" adlandırıldığı qədim yazı da aşkar edilib.

Həmçinin, kilsənin altında daha qədim bir tikilinin qalıqları üzə çıxarılıb. Bu tapıntı yepiskop Villibaldın tarixi qeydləri ilə üst-üstə düşür. Belə ki, o, Vifsaidadakı kilsənin məhz apostol qardaşlar Pyotr və Andreyin evinin yerində inşa edildiyini bildirmişdi.

"Bu kəşf Pyotrun bazilika ilə yaxın əlaqəsi olduğunu və məbədin onun şərəfinə ucaldıldığını göstərən ən tutarlı sübutdur", - deyə Stiven Notli tapıntını şərh edib.

TodayPress TV