Notlar vasitəsilə sterilizasiya olunmuş vəsaitin həcmi 3 dəfəyə yaxın artdı

2025-ci ilin iyun ayının sonuna notlar vasitəsilə sterilizasiya olunmuş vəsaitin toplam qalığı 599.3 mln. manat təşkil edib ki, bu da 2024-cü ilin sonu ilə müqayisədə 2.9 dəfə çoxdur.

TodayPress TV xəbər verir ki, bu barədə Azərbaycan Mərkəzi Bankının (AMB) “Pul Siyasəti İcmalı"nda bildirilib.

Qeyd edilib ki, 2025-ci ilin 6 ayı ərzində açıq bazar əməliyyatları qismində sterilizasiya məqsədilə 28 günlük (1 ay), 84 günlük (3 ay), 168 günlük (6 ay) və 252 günlük (9 ay) notların yerləşdirilməsi üzrə hərraclar davam etdirilib. Ümumilikdə, dövr ərzində Mərkəzi Bankın təşkil etdiyi müxtəlif müddətli not hərraclarının 66-sı baş tutmuşdur. Baş tutan hərraclardan 17-i 28 günlük, 16-ı 84 günlük, 17-i 168 günlük, 16-ı isə 252 günlük notlar üzrə olub.

Son hərraclarda formalaşan gəlirlilik 28 günlük notlar üzrə 7.24%, 84 günlük notlar üzrə 7.54%, 168 günlük notlar üzrə 7.5%, 252 günlük notlar üzrə isə 7.56% olub.