“Qalatasaray” üçün böyük sınaq: İstanbulda “Barcelona” şoku yaşanacaqmı?
“Qalatasaray”ın baş məşqçisi Okan Buruq UEFA Çempionlar Liqasının ümumi mərhələsinin II turunda “Barcelona” klubuna qarşı keçirəcəkləri oyun öncəsi fikirlərini bölüşüb.
TodayPress TV xəbər verir ki, bu barədə UEFA-nın rəsmi saytı məlumat yayıb.
İstanbul təmsilçisinin çalışdırıcısı rəqibin gücünü və oyun üslubunu yaxşı bildiklərini vurğulayıb:
“Barcelona”nın nə qədər güclü olduğunu və hansı futbol oynadığını izah etməyə ehtiyac yoxdur. Formada olduğumuz vaxtlarda oyunçularımızla birlikdə bu stadionda böyük uğurlara imza ata bilmişik. Bizim məqsədimiz hər zaman birdir - qələbə. Hər kəs “Barcelona”nı favorit adlandıracaq, lakin bizim ona qarşı durmağa hazır olan və uğura səmimiyyətlə inanan futbolçularımız var”.
Baş məşqçi əlavə edib ki, komanda müdafiədə diqqətli olmalı, hücumda isə tələsik qərarlar verməməlidir:
“Hücumda sakitliyimizi qorumalı və topa nəzarət etməliyik. Bu mövsüm “Barcelona” az qol buraxır. Bu, rəqibə öz oyununu qəbul etdirməyə çalışan komandadır. Səhvləri minimuma endirməliyik, çünki onlar hər hansı bir diqqətsizliyi dərhal cəzalandırırlar”.
Qeyd edək ki, “Qalatasaray” – “Barcelona” qarşılaşması bu gün, oktyabrın 13-də Bakı vaxtı ilə saat 23:00-da baş tutacaq.
Namiq HUN
