NBA ulduzu Vembanyamadan Fransaya mesaj: “Bu, böyük tabudur”

NBA-nin “San-Antonio Spurs” klubunun 22 yaşlı fransalı ulduzu Viktor Vembanyama peşəkar basketboldakı məqsədlərindən danışıb.

TodayPress TV xəbər verir ki, bu barədə “Basket-Infos” “X” hesabında məlumat yayıb.

“Tarixi dəyişmək mənim həvəsimdir. Bunun səbəbini tam başa düşmürəm, amma bəli, adımı tarixə həkk etmək istəyirəm. Bəzi şeyləri özüm üçün edirəm, lakin məqsədlərim arasında tarixdə iz buraxmağa imkan verəcək hədəflər də var.

Uşaqlıqdan tarixə düşmək istədiyini bilirdin, yoxsa bu arzu sonradan yarandı?” sualına Vembanyama belə cavab verib:

“Hər ikisi. Bilirsən, Fransada bu...”

“Bir qədər tabudur”, – deyə jurnalist əlavə edib.

“Bəli, məhz belədir, bu, böyük tabudur. Hətta NBA-də oynamaq istədiyini və ya peşəkar idmançı olacağını demək belə burada bir növ tabudur. Orta məktəbdə müəllimlərin mənə təzyiq göstərdiyini xatırlayıram.

Bəzən daxilindəki o alova ehtiyacın olur, çünki ətrafındakı hər kəs onu söndürməyə çalışır. Arzunu söndürməyə çalışırlar, çünki bu, bir qədər çılğın görünür.

Amma demək istəmirəm ki, ABŞ-də hər şey daha yaxşıdır. ABŞ-nin də Fransadan min dəfə çox çatışmazlığı var. Bu, sadəcə, yaxşı tərəflərdən biridir.

Digər tərəfdən, orada oyunçular həqiqətən çılğındırlar. Amerikalılar inanılmaz şeylər edirlər. Məhz buna görə NBA-yə gedən amerikalı və fransalı basketbolçuların düşüncə tərzi bir-birindən ciddi şəkildə fərqlənir.

Orada öyrəndiyin, burada sənə heç vaxt öyrədilməyən şeylər var. Eyni zamanda bunun əksi də keçərlidir”, – deyə Vembanyamu bildirib.

Namiq HUN

TodayPress TV