Fonseka FIFA prezidentini sərt ittiham etdi

Fransanın “Lion” klubunun baş məşqçisi Paulu Fonseka FIFA prezidenti Canni İnfantinonun Rusiya komandalarına tətbiq olunan məhdudiyyətlərin mümkün ləğvi ilə bağlı mövqeyini sərt şəkildə tənqid edib.

TodayPress TV xəbər verir ki, o, bu barədə L'Équipe nəşrinə danışıb. 

Fonseka İnfantinonun siyasətini ABŞ prezidenti Donald Trampla müqayisə edərək narazılığını bildirib:

“FIFA prezidenti Rusiya komandalarının geri qayıtmasını mümkün hesab edir. Yəni biz Moskvada oyun planlaşdıraq, amma Ukrayna klubları ev oyunlarını öz ölkəsində keçirə bilməsin? Bu, tamamilə qəbuledilməzdir. Futbol dünyanın bütün problemlərinin həlli deyil, lakin ədalətin bərpasına töhfə verə bilər. İnfantinonun mövqeyi Trampın yanaşmasını xatırladır — iqtisadi maraqlar adi insanların maraqlarından üstün tutulur”. 

Xatırladaq ki, daha əvvəl İnfantino Rusiya komandalarının Avropa turnirlərində iştirakına qoyulan qadağanın aradan qaldırılmasının vacibliyini vurğulamışdı: 

“Rusiyanın kənarlaşdırılması heç bir müsbət nəticə vermədi, əksinə, mənfi fonu və ədalətsizlik hissini gücləndirdi”.

Namiq HUN

TodayPress TV