Bekhem Fransada futbol imperiyası qurmağa hazırlaşır?
“Mançester Yunayted”in sabiq futbolçusu və “İnter Mayami”nin ortaq sahibi Devid Bekhemin adı Fransanın “Nant” klubunun mümkün satın alınması ilə bağlı danışıqlarda gözlənilmədən gündəmə gəlib.
TodayPress TV xəbər verir ki, bu barədə “Ouest-France” məlumat yayıb.
Bildirilir ki, ötən mövsüm Liqa 2-yə düşən “Nant”ın sahibləri klubu satmağı nəzərdən keçirirlər. Hazırda komandaya üç potensial alıcı namizəddir. Təkliflərdən birinin dəyərinin 100 milyon avro olduğu bildirilir.
Nəşr qeyd edir ki, Bekhemin adı “yenidən müzakirələrdə yer alıb”. Onun nümayəndəsi daha əvvəl potensial investorların yerli təşəbbüs qrupu – “Collectif nantais”ın üzvləri ilə görüşüb və “Nant”la bağlı mümkün layihə ilə maraqlanıb.
Bekhemin futbola investisiya sahəsində artıq uğurlu təcrübəsi var. Onun sərvətinin 1,36 milyard avro olduğu qiymətləndirilir. “İnter Mayami”yə yatırımlar sayəsində klub MLS-in ən diqqətçəkən layihələrindən birinə çevrilib.
İndi isə ingiltərəli keçmiş futbolçu futbol biznesini Fransaya da genişləndirmək imkanı əldə edə bilər.
Namiq HUN
