Zelenski Putini taxıl oğurluğunda ittiham etdi - İsrail dəlil tələb edir

Kiyevin Rusiyanın işğal etdiyi ərazilərdən çıxarıldığını iddia etdiyi Ukrayna taxılını daşıyan daha bir gəmi Hayfa limanına çatıb. 

TodayPress TV xəbər verir ki, bunu Ukraynanın xarici işlər naziri Andrey Sibiha bildirib. 

 Ukrayna Prezidenti Volodimir Zelenski isə qeyd edib ki, ölkəsi bu cür ticarətlə məşğul olanlara qarşı sanksiyalar hazırlayır. Lakin İsrail tərəfi bu ittihamları təsdiqləmək üçün Ukraynanın kifayət qədər sübut təqdim etmədiyini bildirir.                                                                                                  Sibiha vurğulayıb: “Dost Ukrayna–İsrail münasibətləri hər iki ölkəyə fayda verə bilər və Rusiyanın oğurlanmış Ukrayna taxılının qanunsuz ticarəti bu münasibətləri zədələməməlidir”.

Onun sözlərinə görə, Ukrayna daha əvvəl də oxşar bir gəminin gəlişi ilə bağlı İsraildən adekvat reaksiya almayıb. Daha sonra isə, Sibiha iddia edir ki, oğurlanmış taxıl yenidən Hayfaya çatdırılıb.

Nazir İsraili bu cür yükləri qəbul etməməyə çağırıb və xəbərdarlıq edib ki, bu, ikitərəfli münasibətlərə mənfi təsir göstərə bilər. O əlavə edib: “Bu kontekstdə biz artıq İsrail səfirini etiraz notası təqdim etmək və müvafiq tədbirlərin görülməsini xahiş etmək üçün rəsmi şəkildə dəvət etmişik”.

Ukrayna Xarici Kəşfiyyat Xidmətinin məlumatına görə, Rusiya işğal olunmuş ərazilərdə yetişdirilən taxılı öz ixracı kimi təqdim edərək xarici bazarlarda satır. Kiyevin hesablamalarına əsasən, təkcə 2025-ci ildə bu yolla 2 milyon tondan çox taxıl ixrac oluna bilərdi.

Kəşfiyyat xidməti həmçinin bildirir ki, Rusiya sanksiyalardan yayınmaq üçün Qafqaz limanlarında “gəmidən gəmiyə” (ship-to-ship) sxemindən istifadə edir. Bu üsul taxılın həqiqi mənşəyini gizlətməyə imkan verir.

Jalə Rövşən 

TodayPress TV