Ukrayna sülh danışıqlarını təxirə salmağı təklif etdi

Ukrayna hazırda Rusiya ilə münaqişənin sülh yolu ilə həlli üzrə danışıqlar aparmaq üçün əlverişli mövqedə deyil və bu danışıqlar yaza qədər təxirə salınmalıdır.

TodayPress TV "Strana.ua"nın "Telegram" kanalına istinadən xəbər verir ki, bu fikri Ukrayna  Ali Radasının  deputatı, Müdafiə Komitəsinin katibi Roman Kostenko səsləndirib.

Onun sözlərinə görə, vəziyyət yaza qədər dəyişə bilər və bundan sonra Kiyev öz tələblərini irəli sürmək imkanına malik olacaq. Lakin deputatın qeyd etdiyinə görə, danışıqlardakı mövqeyi dəyişmək üçün bir neçə məqsədə nail olunmalıdır: döyüş meydanında Rusiya qoşunlarının “dayandırılması”, “onların aylıq itkilərinin 50 minə çatdırılması” və “dronların 80–90 faizinin vurulması”.

“Bu halda artıq "əraziləri bizə geri verin" sualı gündəmdə olmayacaq. Ukrayna isə deyəcək: "Atom Elektrik Stansiyasını, Kinburn burnunu bizə geri verin. Nova Kaxovkanı bizə qaytarın, çünki bu, bizim ərazimizdir", – deyə Kostenko bildirib.

Jalə Rövşən

TodayPress TV