Ukrayna Rusiyaya qarşı daha sərt sanksiyalar tələb edəcək

Ukrayna gələn həftə Avropa İttifaqına (Aİ) müraciət edərək Rusiyaya qarşı yeni və daha genişmiqyaslı sanksiyaların tətbiqini tələb edəcək. Məqsəd Moskvanı beynəlxalq aləmdə tam təcrid etməkdir. 

TodayPress TV xəbər verir ki, bu barədə “Reuters” məlumat yayıb.

Sənəddə Rusiyanın aktivlərinin müsadirəsi və Rusiya neftinin alıcılarına qarşı məhdudiyyətlərin tətbiqi təklif olunur.

Ukrayna Aİ-ni sanksiya siyahısında olan şəxslərin aktivlərinin Ukraynanın xeyrinə sürətli şəkildə müsadirəsini nəzərdə tutan qanunvericiliyi qəbul etməyə çağırır.

Bundan əlavə, Kiyev Aİ-dən siyasi blokun hüdudlarından kənarda da sanksiyaların sərt şəkildə tətbiq olunmasını istəyir. Buraya Rusiya ilə əməkdaşlıq edən xarici şirkətlərə və Rusiyaya yardım edən texnologiyalardan istifadə edən qurumlara qarşı məhdudiyyətlər daxildir. Ukrayna həmçinin Rusiyadan neft alan ölkələrə qarşı “ikinci dərəcəli sanksiyaların” tətbiqini də təklif edir.

Məqalədə qeyd olunub ki, belə sanksiyalar əsasən Hindistan və Çini hədəfə ala bilər. Bu isə Avropa İttifaqı üçün indiyədək atılmamış mühüm addım olacaq.

Qiymət Mahir