Türkiyə lideri İran ətrafındakı böhranı diplomatik yolla həll etməyə çağırdı
"Türkiyə İranın tamamilə məhv edilməsinə yönəlmiş addımları təqdir etmir və eyni dərəcədə Tehranın region ölkələrinə münasibətini də düzgün hesab etmir".
TodayPress TV xəbər verir ki, bu fikirləri Türkiyə Prezidenti Rəcəb Tayyib Ərdoğan İspaniya Baş naziri Pedro Sançes ilə telefon danışığı zamanı bildirib.
O qeyd edib ki, vicdanı olan hər kəs bu gün sülhə can atmalı və İran ətrafındakı böhranın diplomatik həlli yolunun axtarışına diqqət yetirməlidir.
Türkiyə liderinin sözlərinə görə, “qanunsuzluq görməzdən gəlindiyi” müddətdə regionda davamlı sülh mümkün deyil.
Rusiya-Ukrayna müharibəsinə gəldikdə isə o bildirib ki, Ankara beynəlxalq ictimaiyyətin dialoqun bərpasına və qan tökülməsinə son qoyulmasına yönəlmiş sülh səylərinə daha ciddi yanaşmasını vacib hesab edir.
Həmçinin Ankara ilə Madridin bütün sahələrdə, xüsusən də müdafiə sahəsində həmrəyliyindən məmnunluq ifadə edilib ki, bu da ikitərəfli münasibətlərin daha da inkişafı üçün stimul rolunu oynayır.
