Cənubi Koreyada  ilin sonuna qədər donor insan dərisindən hüceyrə xarici matrisə əsaslanan yeddi kosmetik məhsul, o cümlədən ölən donor toxumasından əldə edilən kollagenin istifadəsi ilə hazırlanan məhsullar bazara çıxarıla bilər. 

TodayPress TV xəbər verir ki, bu barədə “The Korea Herald” qəzeti məlumat yayıb.

Bu, sintetik və biomühəndislik alternativlərinə qarşı yeni bir inyeksiya edilə bilən dəri yaxşılaşdırma məhsulları kateqoriyası kimi təqdim olunur. İlk məhsullar 2024-cü ildə bazara daxil olub və onların sayı getdikcə artır. 

Tənqidçilər bildirirlər ki, bu sahə hazırda “boz zona”da fəaliyyət göstərir. Seulda yerləşən Yoon & Yang hüquq firmasının vəkili Kvon Donq-juya görə, mövcud nəzarət əsasən infeksiya və çirklənmə testləri ilə məhdudlaşır, klinik sınaqlar və biotəhlükəsizlik tələbləri isə dərmanlar və tibbi cihazlarla müqayisədə daha yumşaqdır. Halbuki oxşar prosedurlar digər tibbi sahələrdə illərlə ciddi şəkildə tənzimlənir.

Məsələnin etik tərəfi də geniş müzakirə olunur. Bəzi ekspertlər hesab edirlər ki, donor toxumalarının, o cümlədən ölən şəxslərin toxumalarının kosmetik məqsədlərlə istifadəsi könüllü orqan bağışlamasına mənfi təsir göstərə bilər. Cənubi Koreyada bu göstərici ildə təxminən 200 nəfərdir.

Əvvəllər bu materiallar əsasən yanıq müalicəsi və rekonstruktiv cərrahiyyə kimi tibbi sahələrdə istifadə olunurdu. Lakin artan tələbat səbəbilə hazırda estetik tibbdə də daha geniş tətbiq edilir.

1000-dən çox yetkin arasında aparılan sorğuya əsasən, respondentlərin təxminən 60%-i insan toxumalarının kosmetik məqsədlərlə istifadəsinə qadağa qoyulmasını və ya ciddi şəkildə məhdudlaşdırılmasını dəstəkləyir.

Qeyd edək ki, Cənubi Koreya hökuməti  isə texnologiyanın tibbi istifadəsini məhdudlaşdırmamaq üçün ehtiyatlı tənzimləmə aparacağını, eyni zamanda estetik sektorda nəzarəti gücləndirmək və bu cür prosedurların təşviqini məhdudlaşdırmaq üçün tədbirləri nəzərdən keçirdiyini bildirib.

Jalə Rövşən 

TodayPress TV