Almaniyanın sürətlə artan hərbi xərcləri Fransada narahatlıq doğurur, Paris bu prosesin Avropada qüvvələr balansını poza biləcəyindən ehtiyat edir.

TodayPress TV "TASS"a istinadən xəbər verir ki, Fransa rəsmiləri Almaniyanın müdafiə sahəsində genişmiqyaslı yenidən silahlanma planlarından narahatdırlar. Onların fikrincə, bu proses Avropada uzun müddətdir mövcud olan qüvvələr balansına təsir göstərə bilər.

Paris bir tərəfdən Berlinin müdafiə xərclərini artırmasını müsbət qiymətləndirsə də, digər tərəfdən Almaniyanın maliyyə imkanları hesabına Avropada aparıcı mövqeyə çıxmasından ehtiyatlanır. Artan hərbi potensialın Almaniyanın siyasi təsirini gücləndirəcəyi də vurğulanır.

Fransa Avropa Parlamentinin üzvü Fransua-Ksavyer Bellami bildirib ki, Almaniyanın bu istiqamətdə qətiyyətli addımları Fransanın mövqelərini zəiflədə biləcək yeni dinamika yaradır.

Mütəxəssislər xatırladırlar ki, İkinci Dünya Müharibəsindən sonra Avropada Fransa daha çox geosiyasi, Almaniya isə iqtisadi lider kimi çıxış edib. Almaniyanın hərbi gücünü artırması bu tarazlığı dəyişə bilər.

Qeyd olunur ki, Almaniyanın müdafiə xərclərini əhəmiyyətli dərəcədə artırmaq planları NATO çərçivəsində qəbul edilən qərarlarla da uyğunlaşır və bu, bəzi Avropa paytaxtlarında əlavə narahatlıqlar doğurur.

Jalə Rövşən 

TodayPress TV