Bəhreyn İraqa nota verdi

Bəhreyn Xarici İşlər Nazirliyi İraqın müvəqqəti işlər vəkili Əhməd əl-Qaravini nazirliyə çağıraraq, İraq ərazisindən Krallıqdakı hədəflərə qarşı həyata keçirilən davamlı dron hücumları ilə əlaqədar ona etiraz notası təqdim edib.

TodayPress TV  xəbər verir ki, bu barədə "BNA" xəbər agentliyi məlumat yayıb. 

Yayılan açıqlamada qeyd olunur ki, Manama “İraq ərazisindən Krallığa və bir neçə Körfəz Əməkdaşlıq Şurasına üzv ölkəyə qarşı həyata keçirilən davamlı cinayət xarakterli dron hücumlarını” şiddətlə qınayır və buna görə dərin qəzəb hissi keçirir.

Xarici İşlər Nazirliyi həmçinin Krallığın təhlükəsizliyini və sabitliyini qorumaq üçün “bütün zəruri tədbirləri” görmək hüququnu bir daha vurğulayıb.

Qeyd edək ki, ABŞ və İran arasında aprelin 7-də elan edilən iki həftəlik atəşkəsdən sonra Fars körfəzi regionunda, o cümlədən Səudiyyə Ərəbistanında və digər ərəb monarxiyalarında bir sıra hədəflərə qarşı dron hücumları qeydə alınıb. Məlumata görə, bu dronların bəziləri İraq ərazisindən silahlı qruplar tərəfindən buraxılıb.

TodayPress TV