ABŞ beynəlxalq sularda saxladığı "Marinera" tankerindəki iki rus dənizçini azad edib.

TodayPress TV "TASS"a istinadən xəbər verir ki, bu barədə  Rusiya Xarici İşlər Nazirliyi məlumat yayıb.

Rusiya Xarici İşlər Nazirliyinin sözçüsü Mariya Zaxarova bildirib ki, ABŞ beynəlxalq sularda saxlanılan Marinera neft tankerindəki iki rusiyalı dənizçini azad edib. 

Diplomat əlavə edib ki, onlar  Rusiyaya qayıdırlar. 

Qeyd edək ki, "Sky News"un məlumatına görə, ABŞ hərbçiləri "Marinera" gəmisinin kapitanını və iki köməkçisini Venesueladan neft daşımaqda şübhəli bilinərək saxlayıblar. Daha sonra onlar Şotlandiyadan ABŞ-yə aparılıb. Qalan 26 heyət üzvü Böyük Britaniyada qalıb; onlardan beşi tezliklə ABŞ-yə uça bilər, qalanları isə öz ölkələrinə qayıdacaqlar. Həmin vaxt Mariya Zaxarovanın qeyd etdiyi iki rus dənizçinin taleyi barədə məlumat yox idi.

Xatırladaq ki, ekipajında bir neçə rusiyalı olan "Marinera" (əvvəllər "Bella 1") tankeri 7 yanvarda Şimali Atlantikada ələ keçirilib. Əvvəlcə Panama bayrağı altında üzən gəmi 2025-ci ilin dekabr ayının sonunda bayrağını və adını Rusiya bayrağı ilə dəyişib.

ABŞ Sahil Mühafizəsi tərəfindən saxlanıldıqdan sonra tanker Şotlandiyaya çatıb. Rusiya dəfələrlə ABŞ hakimiyyətinə iki rusiyalı dənizçinin azad edilməsinin vacibliyini xatırladıb.

Jalə Rövşən 

TodayPress TV