Din Azərbaycan ailəsini necə qoruya bilər? - İlahiyyatçı rektordan cavab

"Artıq iki ildir ki, Dini Qurumlarla İş üzrə Dövlət Komitəsinin dəstəyi ilə Azərbaycan İlahiyyat İnstitutunda (Aİİ) xüsusi layihə icra olunur. Layihənin əsas məqsədi Beynəlxalq Ailə Günü münasibətilə tələbələrin bu mövzudakı yanaşmalarını dinləmək və müzakirə etməkdir”.

TodayPress TV xəbər verir ki, bunu Azərbaycan İlahiyyat İnstitutunun rektoru Aqil Şirinov jurnalistlərə açıqlamasında deyib.  

O bildirib ki, layihə çərçivəsində tələbələr auditoriyada müəllim rolunda çıxış edərək dərslər keçir, Azərbaycanın milli düşüncə tərzi və milli kimliyində ailə dəyərlərinin oynadığı mühüm rolu təhlil edirlər:

“Bu mühazirələrdə ailə institutu psixoloji, sosioloji və teoloji aspektlərdən araşdırılır. Tələbələrin çıxışları institutun müəllim heyəti ilə yanaşı, ölkənin tanınmış ziyalıları tərəfindən də dinlənilir və hər bir mühazirədən sonra mövzu ətrafında geniş diskussiyalar təşkil olunur”.

Rektorun sözlərinə görə, layihənin strateji hədəfi milli ailə dəyərlərimizi gənc nəslə aşılamaqdır:

“Müasir dünyada ənənəvi ailə modelinə qarşı müxtəlif təhdidlərin mövcudluğu və bu dəyərlərin funksionallığının zəifləməsi fonunda, Azərbaycan ailəsinin öz tarixi köklərinə sadiq qalması xüsusi önəm kəsb edir. İlahiyyat İnstitutunun bu təşəbbüsü həm milli adət-ənənələrə söykənən, həm də müasir dövrün çağırışlarını nəzərə alan nümunəvi ailə modelini cəmiyyətə təqdim etmək məqsədi daşıyır.

Ümid edirik ki, tələbələrimizin bu mühazirələri gələcəkdə daha böyük layihələr üçün stimul olacaqdır. Hazırda institutda ailə dəyərləri ilə yanaşı, qadın hüquqları və erkən nikahların qarşısının alınması kimi aktual mövzularda da silsilə layihələr həyata keçirilir və bu fəaliyyətlər Dini Qurumlarla İş üzrə Dövlət Komitəsi tərəfindən mütəmadi olaraq dəstəklənir”.

Qiymət Mahir

TodayPress TV