Səfir: “Hindistan–Azərbaycan münasibətləri dərin tarixi köklərə malikdir”

“Hindistan və Azərbaycan arasında mövcud olan dərin sivilizasiya və mədəni əlaqələr 2025-ci ildə həyata keçirilən bir sıra yüksək səviyyəli qarşılıqlı səfərlər fonunda daha da güclənib”.

TodayPress TV xəbər verir ki, bunu Hindistan Respublikasının Azərbaycandakı fövqəladə və səlahiyyətli səfiri Sridharan Madhusudhanan Bakıda Hindistanın 77-ci Respublika Günü münasibətilə keçirilən tədbirdə çıxışı zamanı deyib. 

Səfir bildirib ki, bu əlaqələr iki ölkə arasında etimada əsaslanan çoxşaxəli əməkdaşlığın mühüm göstəricisidir.

Onun sözlərinə görə, Hindistanın Baş Nəzarətçi və Auditoru İdarəsinin (CAG) nümayəndə heyəti 17–18 iyul 2025-ci il tarixlərində Asiya Ali Audit Qurumları Təşkilatının (ASOSAI) 62-ci İdarə Heyəti iclasında, eləcə də ASOSAI ilə Ərəb Ali Audit Qurumları Təşkilatı (ARABOSAI) arasında ilk birgə iclasda iştirak etmək üçün Azərbaycana səfər edib.

Səfir qeyd edib ki, Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) sədri qismində Azərbaycan, AQEM-in Beyin Mərkəzləri Forumunun üzvü olan Hindistan Beynəlxalq Münasibətlər Şurasını 2026–2027-ci illər üçün Forumun sədri təyin edib.

O əlavə edib ki, Hindistan il ərzində Azərbaycanın ev sahibliyi etdiyi AQEM çərçivəsində bir sıra tədbirlərdə fəal iştirak edib. Bunlara fevral ayında Yüksək Vəzifəli Şəxslər Komitəsinin iclası, may ayında Biznes Şurasının Plenar Sessiyası və AQEM Biznes Forumu, sentyabr ayında Beyin Mərkəzləri Forumu və Xarici İşlər Nazirləri Şurasının qeyri-rəsmi iclası, noyabr ayında isə AQEM Gənclər Şurası və əlaqədar tədbirlər daxildir.

İlin sonunda isə Hindistanın Rabitə və Kənd Təsərrüfatının İnkişafı üzrə Dövlət Naziri Hindistan nümayəndə heyətinə rəhbərlik edərək 2025-ci ilin noyabrında Bakıda keçirilən Ümumdünya Telekommunikasiyanın İnkişafı Konfransında (WTDC-25) iştirak edib.

Qiymət Mahir