Komor adaları şəhərsalmanı uzunmüddətli dayanıqlılıq strategiyası ilə planlaşdırır
“Dayanıqlılıq bir gündə həll olunan məsələ deyil, strateji planlaşdırma tələb edir”.
TodayPress TV xəbər verir ki, bunu WUF13 çərçivəsində keçirilən “Kiçik Ada Dövlətlərində (SIDS) inklüziv şəhər dayanıqlılığı, mavi iqtisadiyyat və dayanıqlı turizm” adlı xüsusi sessiyada Komor adalarının Ərazi Planlaşdırılması Nazirliyinin Şəhərsalma və Torpaqdan İstifadə üzrə direktoru Mohamed Abdu deyib.
O bildirib ki, Komor adalarında şəhər və ərazi planlaşdırılması hər bir ada üzrə xüsusi inkişaf planları vasitəsilə həyata keçirilir:
“Ölkənin üç əsas adasının hər biri üçün ərazi planlaşdırma sxemi və şəhər inkişaf planı hazırlanır və artıq ən kiçik ada üçün bu planlar tətbiq edilib. Bu yanaşmanın məqsədi problemləri təsadüfi deyil, planlı və elmi əsaslarla həll etməkdir. Dayanıqlılıq qısa müddətli deyil, uzunmüddətli strategiyadır”.
Direktor bildirib ki, effektiv dayanıqlılıq siyasəti üçün ərazinin dəqiq tanınması və risklərin düzgün qiymətləndirilməsi vacibdir:
“Komor adalarında sahil zonaları üzrə aparılan araşdırmalar bu ərazilərin yüksək həssaslığa malik olduğunu üzə çıxarıb. Çoxriskli xəritələşdirmə sistemi hazırlanaraq siklonlar, daşqınlar və dəniz səviyyəsinin qalxması kimi təhlükələr analiz edilir. Bu risklərin planlaşdırmaya inteqrasiyası dayanıqlı şəhər inkişafı üçün əsas şərtdir”.
Qiymət Mahir
