“Soyuq hava, isti ürək: “Qarabağ” “Ayntraxt”ı sındırdı”

Azərbaycan futbolunun flaqmanı “Qarabağ” UEFA Çempionlar Liqasının Liqa mərhələsinin VII turu çərçivəsində Almaniyanın “Ayntraxt” (Frankfurt) klubu ilə üz-üzə gəldi.

Bakı qarşılaşması “Qarabağ” üçün həlledici xarakter daşıyırdı. Bu oyunda məğlubiyyət komandanın turnirdə mübarizəni davam etdirmək şanslarını ciddi şəkildə azalda və ya tamamilə aradan qaldıra bilərdi. Bu qarşılaşmada “Qarabağ” üçün məqbul nəticə yalnız qələbə və ya heç-heçə idi. İstənilən məğlubiyyət komandanın turnir cədvəlindəki vəziyyətini daha da çətinləşdirəcəkdi.

TodayPress TV xəbər verir ki, “Ayntraxt” 13 illik fasilədən sonra Bakıya yenə iddialı gəlmişdi. 

Belə ki, “köhlən atlar”ın indiyədək Almaniyanın avrokuboklarda qarşılaşdığı 4 komandasından biri olan Frankfurt təmsilçisi UEFA Avropa Liqasının 2013/2014 mövsümünə təsadüf edən pley-off mərhələsində Bakıda “Qarabağ”a 2:0, Almaniyada keçirilən matçda isə 2:1 hesabı ilə qalib gəlmişdi.

Amma zaman göstərdi ki, bu gün, o gün deyildi. “Qarabağ” Bundesliqa təmsilçiləri ilə 11-ci dueldə tilsimi qırdı. Azərbaycan futbolu Almaniya komandaları ilə oyunda ilk dəfə qələbə xalı qazandı. Xalqın dirəniş simvolu “Qarabağ” məhz UEFA Çempionlar Liqasının Liqa mərhələsinin taleyüklü VII turunda “Ayntraxtı” büdrətməyi bacardı – 3:2. 

Amma Tarixi Zəfər az tər bahasına başa gəlmədi. “Qarabağ” klub tarixinin ən soyuq oyununda “qartallar”ı əvvəlcə noqdauna saldı, sonda isə bir dəqiq zərbə ilə nokaut etdi. Həqiqətən inanılmazdır! 

“Qarabağ”ın avrokuboklarda iştirak etdiyi bütün illər ərzində bu oyun hava baxımından klub tarixinin ən soyuq qarşılaşmalarından biri oldu. Qısası, meydanda təkcə futbol yox, həm də xarakter oynandı - temperatur aşağı düşsə də, gərginlik maksimum oldu. 

Amma bu amil oyunun taleyini təkbaşına həll etmədi. Əsas həlledici faktor komandanın psixoloji hazırlığı idi. Meydana psixoloji baxımdan tam hazır çıxan “Qarabağ” bu oyunda uduzmadı. Düzgün taktika və yüksək motivasiya ilə “Qarabağ” bu çətin qarşılaşmanı müsbət nəticə ilə başa vuraraq Çempionlar Liqasında yoluna davam edir.

Qeyd edək ki, müasir Azərbaycan futbol tarixinin ən uğurlu klubu hesab olunan “Qarabağ” mütəmadi olaraq ölkəmizi UEFA Çempionlar Liqası və Avropa Liqasının qrup mərhələlərində təmsil edir. Uzun illər erməni işğalı səbəbindən doğma Ağdamdan kənarda çıxış edən klub, 44 günlük Vətən müharibəsində qazanılan tarixi qələbədən və Azərbaycanın ərazi bütövlüyünün tam bərpasından sonra beynəlxalq idman arenasında milli dirçəlişin rəmzinə çevrilib.

Namiq HUN

TodayPress TV