Nyukasl sınağına gedən çətin yol - “Qarabağ” üçün kritik mərhələ

İntensiv təqvim Avropa top-klubları üçün adi sayılsa da, Azərbaycan futbolu və xüsusən qış mövsümü üçün nadir hal hesab olunur. Ölkəmizi UEFA Çempionlar Liqasında təmsil edən “Qarabağ” hazırda paralel olaraq üç cəbhədə - UEFA Çempionlar Liqası, Azərbaycan Premyer Liqası və kubokunda mübarizə aparır. 

Bu isə məşqçi heyətindən ciddi fiziki yük və rotasiya strategiyası tələb edir. Sıx qrafik komandada riskləri artırır. Bu vəziyyətdə əzələ yorğunluğu və zədə ehtimalı yüksəlir. Əsas heyət oyunçularının forması stabil qalmaya bilər. Səfər oyunlarının çoxluğu bərpa prosesini çətinləşdirir.

Qurban Qurbanovun əvvəlki mövsümlərdə Avropa oyunları ilə daxili çempionat arasında balans yaratmaq bacarığı komandanın əsas üstünlüklərindən biri olub. Bununla belə İngiltərənin Nyukasl şəhərinə uzun uçuş komandanın fiziki vəziyyətinə ciddi təsir göstərə bilər.

Təqvimin ən kritik mərhələsinin “Nyukasl”la keçiriləcək iki pley-off oyunu olduğu aydın görünür. Bu qarşılaşmalar klubun beynəlxalq reputasiyası və maliyyə gəlirləri baxımından böyük əhəmiyyət daşıyır. Buna görə də məşqçi heyətinin Premyer Liqa oyunlarında qismən rotasiyaya üstünlük verə biləcəyi ehtimal olunur.

“Qarabağ” məhz bu sıx qrafik səbəbilə “Neftçi” ilə matçın təxirə salınmasını istəyib. Premyer Liqada “Neftçi” - “Qarabağ” oyununun təxirə salınmasına razılıq verilməsi azarkeşlər arasında birmənalı qarşılanmasa da, “ağ-qaralar” “köhlən atlar”a belə bir pas verdilər. “Neftçi”nin rəsmi razılığından sonra Peşəkar Futbol Liqası fevralın 21-də keçirilməli olan qarşılaşmanı daha gec tarixə təxirə salıb. Qərarın məhz “Qarabağ”ın sıx qrafiki və beynəlxalq öhdəlikləri ilə bağlı verildiyi bildirilib. 

18 fevral “Qarabağ” – “Nyukasl” (Çempionlar Liqası) 

24 fevral “Nyukasl” – “Qarabağ” (Çempionlar Liqası)

Qeyd edək ki, son illərdə “Qarabağ” Avropa arenasında çoxsaylı intensiv qrafiklərdən keçib. Komandanın bu cür təqvimlərə adaptasiya qabiliyyəti var. Bununla belə, İngiltərə təmsilçisi kimi fiziki gücə əsaslanan rəqibə qarşı oynamaq əlavə enerji tələb edəcək.

Təbii ki, Çempionlar Liqası prioritetdir. Qurban Qurbanov psixoloji faktor və təcrübə üstünlüyünü nəzərə alaraq prioriteti Çempionlar Liqasına verərək daxili oyunlarda ehtiyat planı seçir. 

Nəticə etibarilə, qarşıdakı günlər “Qarabağ”ın mövsümünün taleyini müəyyən edə biləcək kritik mərhələdir. Komandanın fiziki hazırlığı, heyət dərinliyi və taktiki çevikliyi bu sınağın əsas açarları olacaq.

Namiq HUN