Tam yağlı süd, yüksək yağ tərkibinə baxmayaraq, uşaqlarda piylənmə riskini azalda bilər.

TodayPress TV xəbər verir ki,  araşdırmanın nəticələri "American Journal of Clinical Nutrition" (AJCN) jurnalında dərc olunub.

Tədqiqat çərçivəsində geniş və uzunmüddətli uşaq sağlamlığı müşahidə proqramının məlumatlarından istifadə edilib. Alimlər uşaqların körpəlik dövründə istehlak etdikləri süd növünü — tam yağlı, az yağlı və ya yağsız — izləyərək bu göstəriciləri onların 5 və 8 yaşlarında bədən çəkisi və yağ göstəriciləri ilə müqayisə ediblər.

Nəticələr göstərib ki, müntəzəm olaraq tam yağlı süd içən uşaqların bədən kütlə indeksi daha aşağı olur. Həmçinin, 8 yaşına qədər bu uşaqlarda piylənmə riski yağsız süd istehlak edənlərlə müqayisədə 69% daha azdır. Ümumilikdə, südün daha yüksək yağ tərkibi daha əlverişli bədən tərkibi göstəriciləri ilə əlaqələndirilib.

Tədqiqatçılar qeyd edirlər ki, bu nəticələr uşaqların qidalanması ilə bağlı əvvəlki tövsiyələrlə — xüsusilə az yağlı süd məhsullarına üstünlük verilməsi ilə — ziddiyyət təşkil edir. Müəlliflərin fikrincə, süd yağı daha uzun müddət toxluq hissi yarada bilər və bu da fast food, şirniyyat və şəkərli içkilərin istehlakını azaltmağa kömək edə bilər. Bununla belə, bu əlaqənin əsas mexanizmləri hələ tam aydınlaşdırılmayıb

Jalə Rövşən 

TodayPress TV