DİQQƏT! Bu saqqızlardan zəhərlənə bilərsiniz

Bakı şəhəri 14 saylı tam orta məktəbin bir qrup şagirdinin saqqızdan zəhərləndiyi ehtimalı ilə bağlı yayılan məlumatlar cəmiyyətdə narahatlıq yaradıb. 

Məsələ ilə bağlı TodayPress TV-yə danışan qida eksperti Fərid Səfərov bildirib ki, saqqız ümumiyyətlə təhlükəli qida hesab edilmir, lakin bəzi hallarda zəhərlənməyə bənzər simptomlar yarana bilər:

"Saqqızdan birbaşa zəhərlənmə çox nadir haldır. Amma saqqızın vaxtının keçməsi, düzgün saxlanılmaması, içində normadan çox dadlandırıcı olması və ya qeyri-rəsmi, keyfiyyətsiz istehsal riski artırır".

Onun sözlərinə görə, küçədə satılan, qeyri-qanuni istehsal olunan və etiket məlumatı tam olmayan saqqızlarda təhlükəli maddələr ola bilər:

“Qeydiyyatsız və ya küçədə satılan saqqızlarda saxta rəngləndiricilər, keyfiyyətsiz aromatlar və gigiyenik olmayan qablaşdırma ola bilər. Bu isə zəhərlənmə riski yaradır. Şəkərli saqqızlar diş çürüməsinə səbəb ola bilər. Şəkərsiz saqqızlarda istifadə olunan sorbitol, mannitol, ksilitol kimi maddələr həddindən artıq istifadə edilərsə, bəzi uşaqlarda qarın ağrısı, köp, ishal yarada bilir. Bəzi rəng və ətir vericilər uşaqlarda allergik reaksiyalar, başgicəllənmə, ürəkbulanma yarada bilər. Orqanizmə keçməsə də, bəzi həssas uşaqlarda dad və qoxu maddələrinə qarşı reaksiya mümkündür".

Ekspertə görə, bir çox valideynlər təhlükəni yalnız dad dəyişəndə hiss edir, lakin başqa əlamətlər də var:

"Bunlar qoxunun dəyişməsi, kimyəvi və ya qəribə kəskin qoxu, dadın turş, acı və ya metal kimi olması, rəngin solması və səthdə ləkələrin yaranması, qablaşdırmanın nəm çəkməsi, şişməsi və ya cırılması, etiketsiz və ya istehsalçı məlumatı olmayan məhsullardır".

Mütəxəssis vurğulayıb ki, saqqızdan sonra şiddətli qarın ağrısı, qusma, başgicəllənmə, tez-tez ishal və ya ağızda yanma varsa, dərhal tibbi yardıma müraciət edilməlidir:

"Saqqız ümumiyyətlə təhlükəli məhsul deyil, amma keyfiyyətsiz, vaxtı keçmiş və içində yüksək miqdarda dadlandırıcı olan saqqızlar xüsusilə uşaqlarda narahatlıq yarada bilər. Valideynlər həmişə etiketə, qablaşdırmaya və məhsulun görünüşünə diqqət etməlidirlər", - deyə Fərid Səfərov fikrini sonlandırıb.

Türkan İsgəndərli

TodayPress TV