Azərbaycandan unikal güc - Avropanı idarə etməyə başladıq

"Azərbaycan-İtaliya münasibətləri yeni mərhələyə qədəm qoyur. Artıq bu əlaqələr sadəcə iqtisadi əməkdaşlıq çərçivəsini aşaraq genişmiqyaslı strateji tərəfdaşlığa çevrilir".

TodayPress TV xəbər verir ki, bunu ekspert Rauf Ağamirzəyev deyib.

Onun sözlərinə görə, Azərbaycan ilə İtaliya arasında mövcud əlaqələr artıq Avropa üçün kritik əhəmiyyət kəsb edən strateji səviyyəyə yüksəlib:

"Azərbaycanın əsas ticarət tərəfdaşı olan İtaliya ilə münasibətlər bu gün xüsusilə enerji təhlükəsizliyi kontekstində Avropa üçün həyati əhəmiyyət daşıyır. Xəzərdən Avropaya uzanan Cənub Qaz Dəhlizi artıq təkcə enerji layihəsi deyil, bütövlükdə Avropanın enerji arxitekturasının əsas sütunlarından birinə çevrilib".

Ekspert vurğulayıb ki, bu layihə çərçivəsində İtaliya yalnız öz enerji təhlükəsizliyini təmin etmir, eyni zamanda Avropanın digər iri iqtisadiyyatları üçün də mühüm rol oynayır:

"Bu dəhliz vasitəsilə İtaliya Avstriya və Almaniya kimi ölkələr üçün vacib tranzit mərkəzi funksiyasını yerinə yetirir. 2026-cı ildən etibarən Azərbaycan qazının yeni bazarlara çıxışı isə İtaliyanın rolunu daha da gücləndirərək onu Avropanın aparıcı qaz tranzit hablarından birinə çevirəcək. Tərəfdaşlıq yalnız enerji sektoru ilə məhdudlaşmır. Son illərdə əməkdaşlıq nəqliyyat, maliyyə və sənaye sahələrində də dərinləşib. Azərbaycan Dövlət Neft Fondunun "BlackRock" və onun platforması olan "Global Infrastructure Partners" vasitəsilə "Italo – Nuovo Trasporto Viaggiatori"yə investisiya yatırması artıq nəqliyyat və infrastruktur sahələrində inteqrasiyanın gücləndiyini göstərir".

Mütəxəssis sənaye sahəsində əməkdaşlığın da genişləndiyini diqqətə çatdırıb:

""8 Noyabr" İES layihəsində Ansaldo Energia şirkətinin iştirakı onu göstərir ki, bu tərəfdaşlıq artıq texnologiya transferi və sənaye əməkdaşlığını da əhatə edir. Bütün bu amillər Azərbaycan–İtaliya münasibətlərinin keyfiyyətcə yeni mərhələyə keçdiyini sübut edir. Bu gün biz klassik ticarət münasibətlərindən fərqli olaraq, enerji, nəqliyyat, maliyyə və sənaye sahələrini birləşdirən çoxşaxəli strateji tərəfdaşlıq modelinin formalaşdığını görürük. Bu model həm Azərbaycanın Avropadakı rolunu gücləndirir, həm də İtaliyanı Cənubi Qafqaz və Xəzər regionu ilə birləşdirən əsas geoiqtisadi körpülərdən birinə çevirir".

Qeyd edək ki, 4 mayda İtaliya Nazirlər Şurasının sədri Ciorcia Meloni Azərbaycan Respublikasına səfərə gəlib.

Türkan İsgəndərli

TodayPress TV