Azərbaycanla Türkmənistan arasında aparılan ticarət əməliyyatlarının həcmi açıqlandı

Ötən il Azərbaycanla Türkmənistan arasında ticarət əməliyyatlarının həcmi 383,7 milyon ABŞ dolları təşkil edib.

Bu barədə TodayPress TV-yə Dövlət Gömrük Komitəsindən məlumat verilib.

Məlumata görə, bu, 2023-cü ildəki göstərici ilə müqayisədə 390,2 milyon ABŞ dolları və ya təqribən 2 dəfə azdır. Hesabat ilində Türkmənistan ilə ticarət dövriyyəsi Azərbaycanın ümumi ticarət dövriyyəsinin 0,81%-i həcmində olub.

Ötən il Azərbaycandan Türkmənistana 80,2 milyon dollarlıq məhsul ixracı qeydə alınıb. Bu, 2023-cü ildəki göstərici ilə müqayisədə təqribən 5,9 milyon ABŞ dolları və ya 6,8% azdır.

Həmçinin 2024-cü il ərzində Türkmənistandan Azərbaycana 303,5 milyon ABŞ dolları dəyərində idxal əməliyyatları icra olunub ki, bu da illik müqayisədə 384,3 milyon ABŞ dolları və ya təqribən 2,3 dəfə azalma deməkdir.

Təkcə 2025-ci ilin yanvar-may aylarında isə Azərbaycanla Türkmənistan arasında ticarət əməliyyatlarının həcmi 118,5 milyon ABŞ dollarına bərabər olub. Bu isı 2024-cü ilin eyni aylarındakı göstərici ilə müqayisədə 84,5 milyon ABŞ dolları və ya 41,6% azdır. Hesabat dövründə Türkmənistan ilə ticarət dövriyyəsi Azərbaycanın ümumi ticarət dövriyyəsinin 0,56%-i həcmində olub.

Cari ilin yanvar-may aylarında Azərbaycandan Türkmənistana 19,2 milyon dollarlıq məhsul ixracı qeydə alınıb. Bu, 2024-cü ilin eyni dövrü ilə müqayisədə təqribən 12,8 milyon ABŞ dolları və ya 39,9% azdır.

Həmçinin 2025-ci ilin yanvar-may aylarında Türkmənistandan Azərbaycana 99,2 milyon ABŞ dolları dəyərində idxal əməliyyatları icra olunub ki, bu da illik müqayisədə 71,8 milyon ABŞ dolları və ya 42% azalma deməkdir.