"Samsung" "Galaxy Wide Fold"u 1 milyonluq startla buraxacaq

"Samsung" rekord həcmdə start partiyası ilə yeni qatlanan smartfonu "Galaxy Wide Fold" modelini təqdim etməyi planlaşdırır. İlkin mərhələdə 1 milyon ədəd cihazın buraxılması nəzərdə tutulur.

TodayPress TV xəbər verir ki, bu barədə insayder "Ice Universe" "X" sosial şəbəkəsində "ETNews"ə istinadla məlumat yayıb.

Bildirilir ki, bu həcm "Samsung"un son üç ildə ixtisaslaşmış modellər üzrə ən böyük start partiyasıdır və şirkətin qatlanan smartfonları niş məhsuldan kütləvi seqmentə çıxarmaq niyyətindən xəbər verir.

"Galaxy Wide Fold" daha “kitab tipli” dizayna sahib olacaq. Açıq vəziyyətdə smartfon 7,6 düymlük OLED ekran (4:3 nisbəti), xarici hissədə isə 5,4 düymlük ekran alacaq. Cihaz soldan sağa qatlanacaq. Müqayisə üçün qeyd olunur ki, gələcək "Fold8" modeli daha uzunsov – 18:20 nisbətini saxlayacaq.

Mütəxəssislər "Wide Fold"un ortaya çıxmasını "Apple"ın oxşar form-faktorda qatlanan "iPhone" hazırlaması ilə bağlı şayiələrlə əlaqələndirirlər. "Samsung" isə 1 milyonluq start partiyası ilə bazar tələbatını ölçməyi və lazım gələrsə istehsalı sürətlə artırmağı planlaşdırır. Uzunmüddətli hədəf isə qatlanan smartfonların illik tədarükünü 5 milyon ədədə çatdırmaqdır.

Qiymət Mahir