"Meta" Aİ-də siyasi və ictimai reklamları blokladı

"Facebook" və "Instagram" kimi platformaların sahibi "Meta" Avropa İttifaqında (Aİ) siyasi, ictimai və seçki ilə bağlı reklamların yayımını dayandıracağını elan edib.

TodayPress TV xəbər verir ki, bu barədə "Reuters" məlumat yayıb. 

Şirkətin bu qərarı, 10 oktyabr 2025-ci ildən qüvvəyə minəcək Aİ-nin yeni siyasi reklam qaydaları (TTPA) ilə bağlıdır. Yeni qaydaların əsas məqsədi siyasi reklamların kim tərəfindən maliyyələşdirildiyini daha şəffaf göstərmək və onları daha asan tanınan hala gətirməkdir. Qanunvericilik təşəbbüsü, Aİ ölkələrində dezinformasiya və xarici müdaxilələrin artması ilə bağlı narahatlıqlar fonunda irəli sürülüb.

Yeni qaydalara əsasən, texnologiya şirkətləri platformalarında yayımlanan siyasi reklamları aydın şəkildə işarələməli, həmin reklamların kim tərəfindən maliyyələşdirildiyini və buna nə qədər vəsait xərcləndiyini göstərməlidirlər.

Qaydaların pozulması halında ciddi cərimələr nəzərdə tutulur.

Töhfə Səməd