İnternet tarifləri artırılacaq? - AÇIQLAMA

Növbəti il internet tariflərinin  bahalaşıb-bahalaşmayacağı cəmiyyətdə ciddi maraq doğurur. Region ölkələrində artıq müşahidə olunan qiymət artımları Azərbaycanda da oxşar qərarların qəbul edilə biləcəyi ehtimalını gücləndirir. 

2026-cı ildə internet tariflərinin artırılması məsələsi gündəmə gələ bilər?

Mövzu ilə bağlı TodayPress TV-yə danışan iqtisadçı Günay Hüseynova bildirib ki, internet tariflərinin kəskin şəkildə artırılması üçün ciddi və əsaslandırılmış səbəblər olmalıdır. 

Onun sözlərinə görə, qlobal iqtisadiyyatda növbəti il üçün müəyyən qiymət artımlarının gözlənilməsi təbiidir:

"Lakin bu amil əmək haqları, müavinətlər və pensiyaların artım tempini əhəmiyyətli dərəcədə üstələyən tarif artımlarını avtomatik olaraq əsaslandıra bilməz. Dünya ölkələrində internet qiymətlərini müqayisə edərkən yalnız nominal tariflərə deyil, eyni zamanda əhalinin sosial-iqtisadi rifah səviyyəsinə, orta aylıq gəlirlərinə və yaşayış xərclərinə də diqqət yetirilməlidir. Əgər əmək haqları orta hesabla 10-12% artdığı halda, internet tariflərinin 30-35% yüksəldilməsi təklif olunursa, bu yanaşmanın iqtisadi və sosial baxımdan hansı məntiqə söykəndiyi sual doğurur".

Ekspert Azərbaycan Respublikasının Konstitusiyasını xatırladaraq qeyd edib ki, dövlətin ali məqsədi insan və vətəndaş hüquqlarının qorunması, onların sosial və iqtisadi rifahının təmin edilməsidir. Bu baxımdan, qiymət siyasətində sosial balansın qorunması xüsusi əhəmiyyət kəsb edir:

"Tarif artımı yalnız real zərurət olduqda, xidmətin təkmilləşdirilməsi və keyfiyyətinin artırılması ilə əsaslandırılmalıdır. Hətta bu halda belə, artım kəskin deyil, mərhələli və ölçülü şəkildə həyata keçirilməlidir".

İqtisadçı təklif edib ki, internet xidmətlərində diferensial tarif siyasəti tətbiq olunsun:

"Yəni sıravi vətəndaşlar üçün sosialyönümlü tariflər, şirkətlər və kommersiya qurumları üçün isə fərqli, daha yüksək tariflər müəyyən edilsin. Çünki şirkətlər bu cür artımları öz gəlirləri hesabına kompensasiya edə bilsələr də, vətəndaşlar üçün bu, ailə büdcəsinə əlavə və ciddi maliyyə yükü yaradır", - deyə Günay Hüseynova qeyd edib.

Türkan İsgəndərli