Dünya ölkələrinin kibertəhlükə statistikası açıqlandı

Yaxın Şərqdə gərginliyin artması fonunda, 2025-ci ilin birinci yarısında İsrail və İran dünyanın ən çox kiberhücumlara məruz qalan ölkələri sırasına daxil olub. İsrail bütün hücumların 8,4%-i ilə dördüncü, İran isə 8,1%-lik göstərici ilə beşinci yerdə qərarlaşıb.

TodayPress TV xəbər verir ki, bu barədə “StormWall” məlumat yayıb. 

2025-ci ilin birinci yarısında kiberhücumların sayı ötən ilin eyni dövrü ilə müqayisədə 108% artıb. 

Antireytinqin liderləri isə ABŞ (12,6%), Çin (10,4%) və Hindistan (9,2%) olub. 

Mütəxəssislər bu ölkələrin hədəf seçilməsini həm inkişaf etmiş iqtisadiyyatları, həm də regional və qlobal münaqişələrdəki rolları ilə izah edirlər.

Xüsusilə Hindistan və Pakistan arasındakı gərginlik fonunda bu hücumlar artmaqdadır.

Avropa dövlətləri də ilk onluğa düşüb. Almaniya (7,6%) altıncı, Böyük Britaniya (7,3%) isə yeddinci sıradadır. 

Bu ölkələr həm "ransomware" hücumları, həm də siyasi qərarlara qarşı narazılıq göstərən aktivistlərin hədəfi olublar.

Əvvəllər siyahının ilk yerlərində olan Rusiya bu dəfə 6,4% göstərici ilə səkkizinci yerdə qərarlaşıb. 

Vurğulanıb ki, bu dövrdə hakerlər və siyasi motivli qrupların hücumları ilə yanaşı, Vahid Dövlət İmtahanı və universitetlərdə qəbul proseslərini pozmağa çalışan məktəblilərin iştirakı ilə kütləvi insidentlər də qeydə alınıb.

Səudiyyə Ərəbistanı (5,3%) və Sinqapur (5,1%) da ilk onluqda yer alıb. Analitiklərə görə, Səudiyyə Ərəbistanı enerji və maliyyə sektoru, Sinqapur isə inkişaf etmiş texnoloji infrastrukturu səbəbilə hücumların əsas hədəfinə çevriliblər.

Qeyd edək ki, kiberhücumları nəticəsində dövlət qurumları, maliyyə və energetika sektoru, media və təhsil sahələri ciddi zərər görə bilər. Mütəxəssislər hökumətləri və özəl sektoru kibertəhlükəsizlik tədbirlərini gücləndirməyə çağırırlar.