“Apple” blogeri məhkəməyə verdi

“Apple” məşhur “YouTub blogeri Con Prosseri məhkəməyə verib. Şirkət onu “iOS 26” əməliyyat sisteminə aid məxfi görüntüləri qanunsuz əldə edib paylaşmaqda ittiham edir.

TodayPress TV xəbər verir ki, bu barədə məlumatı “MacRumors” yayıb. 

Bildirilir ki, Prosser ilin əvvəlində yayımladığı videolarda yeni sistemin dizaynını – “Kamera”, “Mesajlar” tətbiqlərinin yenilənmiş görünüşünü və “Liquid Glass” adlı interfeysi göstərib.

“Apple”ın iddiasına görə, bu görüntülər şirkətin əməkdaşı İtan Lipnikə məxsus mühəndis “iPhone”dan sızdırılıb. Prosser Lipnikin dostu Maykl Ramaççiotti ilə birlikdə plan quraraq cihazın məlumatlarını ələ keçirib. Ramaççiotti evə daxil olub, cihazı açaraq Prosserə “FaceTime” zəngi ilə göstərib. Bloger həmin görüntüləri yazıb videoya çevirib.

“Apple” bildirir ki, həmin telefonda başqa məxfi məlumatlar da olub və onların da yayılmasından narahatdır. Şirkət məlumatların yayılmasının qarşısını almaq və dəymiş zərərin ödənilməsi üçün məhkəməyə müraciət edib.

Lipnik artıq “Apple”dan uzaqlaşdırılıb. Con Prosser isə açıqlamasında bu hadisənin təfərrüatlarından xəbərsiz olduğunu və məsələni “Apple” ilə müzakirə etməyə hazır olduğunu bildirib.

Qiymət Mahir