Tennis dünyası Monfislə vidalaşmağa hazırlaşır
24 qat “Böyük Dəbilqə” çempionu Novak Cokoviç fransalı tennisçi Qael Monfilsin dünya tennisinə təsirindən danışıb.
TodayPress TV xəbər verir ki, o, bu barədə “Rolan Qarros-2026” çərçivəsində keçirilən mətbuat konfransında bildirib.
Cari mövsümdən sonra peşəkar karyerasını başa vuracağını açıqlayan Monfislə bağlı fikirlərini bölüşən serbiyalı idmançı onun həm insan, həm də tennisçi kimi iz qoyduğunu deyib:
“Onun haqqında danışanda hər zaman deyirəm ki, ən böyük mirası gözəl insan olmasıdır. O, daim gülümsəyir və pozitiv enerji yayır. Karyerası ərzində çoxsaylı zədələr və çətinliklər yaşasa da, geri qayıtmağı bacardı.
Monfis tennis tarixinin ən atletik oyunçularından biridir. Onun sürüşmələri, müdafiəsi və sməş zamanı sıçrayışları hər zaman xüsusi olub. Açığı, onu izləmək mənim üçün həmişə böyük zövq idi. O, həm də qarşılaşmaqdan ən çox həzz aldığım rəqiblərdən biri idi”.
Serbiyalı tennisçi ATP və WTA nümayəndələrinin Monfisin karyerasını birlikdə qeyd etməsini də xüsusi və emosional an adlandırıb.
Namiq HUN
