Qələbə seriyası davam edir: Süleymanlı zirvəni ələ keçirdi!

Azərbaycanlı qrossmeyster Aydın Süleymanlı şahmat üzrə fərdi Avropa çempionatında liderliyə yüksəlib.

Polşanın Katovitse şəhərində keçirilən turnirdə VII turdan sonra 6 xal toplayan şahmatçımız 1-4-cü yerləri bölüşsə də, əlavə göstəricilərə görə birinci pillədə qərarlaşıb.

TodayPress TV xəbər verir ki, Süleymanlı bu nəticəyə belçikalı Daniel Daroha üzərində qələbədən sonra nail olub. Hazırda onun aktivində 5 qələbə və 2 heç-heçə var.

Liderliyini qorumaq üçün Aydın VIII turda gürcüstanlı Nikolaz Kaçarava ilə qarşılaşacaq.

Turnirdə uğurlu çıxış edən digər təmsilçimiz Nicat Abasov isə 7 turdan sonra 5,5 xalla 10-cu pillədə qərarlaşıb.

Qeyd edək ki, 11 turdan ibarət Avropa çempionatında ilk 20 yeri tutan şahmatçılar 2027-ci il Dünya Kubokuna vəsiqə qazanacaqlar.

Namiq HUN

TodayPress TV