Qardaşlıqdan sükuta: Cordan-Pippen münasibətinin görünməyən həqiqətləri

NBA tarixində altı çempionluq, iki “three-peat” və 1990-cı illərə damğa vuran hegemonluq – bütün bunlar ilk növbədə Maykl Cordan və Skotti Pippen tandemi ilə bağlıdır. Lakin bu uğurlu modelin dağılması emosional partlayışla yox, səssiz məsafə ilə baş verdi.

Bu ayrılığı anlamaq üçün məsələyə emosional deyil, struktur və faktlar prizmasından baxmaq lazımdır.

1991–1998-ci illər aralığında “Bullz” 6 titul qazandı. Statistik faktlar göstərir ki, Cordan 6 finalın hamısında MVP seçilib. Pippen həmin illərdə 7 dəfə All-Star olub və 8 dəfə All-Defensive Team-ə düşüb. 1993–1994-cü illər mövsümündə Cordanın yoxluğunda Pippen komandanı 55 qələbəyə aparıb və MVP səsverməsində 3-cü olub.

Bu fakt sübut edir ki, Pippen sadəcə “ikinci oyunçu” deyildi. O, komandanın müdafiə sisteminin mərkəzi idi və hücum quruculuğunda əsas fiqurlardan sayılırdı.

Lakin NBA tarixində narrativ həmişə final atışını edən oyunçu üzərində qurulur. Bu isə simvolik üstünlüyü Cordanın xeyrinə möhkəmləndirdi.

2020-ci ildə yayımlanan “The Last Dance” sənədli serialı hadisələri əsasən Cordanın baxış bucağından təqdim etdi. Serialdan sonra Cordanın brendi və kommersiya dəyəri yenidən yüksəldi. Pippen isə açıq şəkildə layihəni tənqid etdi və öz rolunun kiçildildiyini bildirdi.

Tarix kim tərəfindən danışılırsa, dominant obraz da o olur. Pippenin narazılığı emosional deyil, reputasiya ilə bağlı idi. Çünki irs yalnız titullarla yox, yaddaşla ölçülür.

Komandanın sabiq baş məşqçisi Fil Cekson bildirmişdi ki, Maykl sadəcə məyus olub. 

Cordan karyerası boyu tənqidə aqressiv reaksiya verən lider kimi tanınıb. Lakin bu dəfə susdu. Bu susqunluq iki cür yozula bilər. Ya münasibət onun üçün artıq əhəmiyyət daşımırdı. Ya da o, Pippeni artıq bərabər tərəfdaş kimi görmürdü. Hər iki halda bu, münasibətin bərpası üçün boşluq buraxmadı.

Faktlardan biri də Pippenin 1990-cı illərdə NBA-nın ən aşağı maaş alan ulduzlarından biri olmasıdır. O, uzunmüddətli və az məbləğli müqaviləyə imza atmışdı.

Bu isə illərlə “kölgədə qalma” hissini gücləndirən amillərdən biri idi. Uğur kollektiv idi, amma şöhrət fərdi oldu.

Bir sözlə, Cordan və Pippen münasibətləri qalmaqalla yox, narrativ mübarizəsi ilə bitib. Onların basketbol irsi dəyişməz qalır – 6 titul və NBA tarixinin ən dominant dövrü. Lakin şəxsi münasibət səviyyəsində tərəfdaşlıq artıq arxivə çevrilib.

Bu hadisə göstərir ki, böyük duetlərin dağılması üçün mütləq qalmaqal lazım deyil. Bəzən fərqli yaddaş və fərqli özünüdərk kifayət edir.

Namiq HUN