NBA çempionu: “Lebron oynamaqdan bezib”
2021-ci ildə “Miluoki Baks” klubu ilə Milli Basketbol Assosiasiyasının (NBA) çempionu olan sabiq oyun qurucusu Ceff Tiq, “Los-Anceles Leykers”in lideri Lebron Ceymsin yaxın zamanda peşəkar karyerasını bitirə biləcəyini ehtimal edir.
TodayPress TV xəbər verir ki, Tiq bu fikrini “Club 520” podkastında səsləndirib:
“O, sanki artıq oynamaqdan bezdiyini hiss etdirir. Elə ifadələr işlədir ki, məsələn: ‘İşi gənclərə ötürürəm’.”
Xatırladaq ki, “Los-Anceles Leykers” cari mövsüm pley-off mərhələsinin ilk raundunda “Minnesota Timbervulvz”a 1:4 hesabı ilə uduzaraq mübarizəni dayandırıb.
Lebron Ceyms beş oyunda orta hesabla 25,4 xal toplayıb, 9 ribaund və 5,6 məhsuldar ötürmə edib.
NBA tarixində ən çox xal toplayan oyunçu olan Lebron Ceymsin gələcəyi ilə bağlı qərarı basketbol ictimaiyyəti tərəfindən maraqla gözlənilir.
Namiq HUN
