“Napoli” Bakıya xal dalınca gələcək: Alleqri hədəfini açıqladı
“Napoli” klubunun baş məşqçisi Massimiliano Alleqri UEFA Çempionlar Liqasının pley-off mərhələsinə vəsiqə qazanmaq üçün Azərbaycan çempionu “Sabah”la qarşılaşmada xal ehtiyatını artırmağı hədəfləyir.
TodayPress TV xəbər verir ki, italiyalı mütəxəssis bu barədə Çempionlar Liqasının Liqa mərhələsinin IV turunda Portuqaliyanın “Porto” klubuna qarşı keçiriləcək səfər oyunu öncəsi mətbuat konfransında danışıb.
Alleqri növbəti mərhələyə yüksəlmək üçün 10 xalın kifayət edəcəyini düşündüyünü bildirib:
“Bu, bizim üçün son şans deyil. Düşünürəm ki, pley-offa vəsiqə qazanmaq üçün 10 xal kifayət edəcək. “Porto” ilə oyun vacibdir, lakin “Mançester Siti” ilə qarşılaşmada uğur qazanmaq öhdəsindən gəlmək mümkün olmayan vəzifədir. Buna görə də növbəti mərhələyə vəsiqə uğrunda “Brügge”, “Sabah” və “Vikinq”lə oyunlarda mübarizə aparacağıq”.
“Napoli” Çempionlar Liqasının ümumi turnir cədvəlində 3 xalla 24-cü pillədə qərarlaşıb. Eyni xala malik “Sabah” isə vurulan və buraxılan qolların fərqinə görə İtaliya təmsilçisindən geri qalaraq 25-ci yerdədir.
Qeyd edək ki, “Sabah” – “Napoli” qarşılaşması 2027-ci il yanvarın 20-də Bakıda keçiriləcək. Komandalar Liqa mərhələsinin VII turunda üz-üzə gələcəklər.
Namiq HUN
