MİLLİDƏ DƏYİŞİKLİK KÜLƏYİ: KÖHNƏ ADLAR, YENİ ÜMİDLƏR
Azərbaycan 2026/2027-ci illər mövsümündə UEFA Millətlər Liqasının D2 qrupunda Litva və Lixtenşteynlə mübarizə aparacaq. Milimiz ilk oyununu sentyabrın 27-də Litva ilə səfərdə keçirəcək. Komandamız oktyabrın 1-də və 4-də isə həm Lixtenşteynlə, həm də Litva ilə evdə oynayacaq.
Baş məşqçi Ayxan Abbasovun bu oyunlar üçün açıqladığı 30 nəfərlik heyətin ən diqqətçəkən xüsusiyyəti nəticəyə hazır, təcrübəli futbolçularla yeni nəsil seçimlərinin qarışdırılmasıdır. Heyətdə Premyer Liqanın “Neftçi”, “Sabah” və “Qarabağ” klublarının çəkisi yüksəkdir.
İyunda San Marino ilə oyunda istifadə olunan heyətlə müqayisədə komandada 17 futbolçu yerini qoruyub saxlamağa müvəffəq olub. Heyətə 13 yeni ad əlavə edilib, 8 futbolçu isə bu dəfə siyahıda yoxdur. Məşqçilər heyəti xüsusən qapıçı, müdafiə və hücum xəttində yenilənməyə üstünlük veriblər.
İyundakı heyətdə Şahruddin Məhəmmədəliyev, Rza Cəfərov, Elvin Cəfəroğlu, Qismət Əliyev, Səbuhi Abdullazadə, Rüstəm Əhmədzadə və Nəriman Axundzadə vardı.
Yeni siyahıda onların yerinə və ya əlavə olaraq Rəvan Mirzəmmədov, Aydın Bayramov, Murad Xaçayev, Anton Krivotsyuk, Abdulla Xaybulayev, Ceyhun Nuriyev, Ayxan Hüseynov, Edqar Adilxanov, Oruc Məmmədov, Rüfət Abdullazadə, Anatoli Nuriyev, Fərid Yusifli və Musa Qurbanlı gəlib.
Emil Balayev heyətin ən təcrübəli qapıçısıdır. Əvvəlki heyətdən qalan qolkiper artıq 34 yaşındadır və klub səviyyəsində də gənc rəqabətlə üz-üzədir. Buna görə Balayev milli üçün qısa müddətli etibarlılıq baxımından ön plandadır.
Uzunmüddətli proqramda rəhbərlik “Zirə”nin əsas qapıçılarından olan Aydın Bayramova köklənib. O, 2026/2027-ci illər mövsümündə UEFA Konfrans Liqasının təsnifatında “Torpedo Kutaisi” ilə hər iki oyunda, həmçinin “Paide” ilə hər iki qarşılaşmada 90 dəqiqə oynayıb. Bu səbəbdən onun çağırılması potensial və klub mühitində inkişaf perspektivi ilə əsaslandırılıb. “Sabah”ın qapıçısı Rəvan Mirzəmmədov isə bu çağırışın maraqlı yeni seçimlərindəndir. Məncə, bu üçlükdə ən maraqlı rəqabət Balayevlə Bayramov arasında olacaq.
Müdafiədə - Murad Xaçayev, Elvin Bədəlov, Rüfət Abbasov, Rəhman Daşdəmirov, Tellur Mütəllimov, Rahil Məmmədov, Anton Krivotsyuk, Toral Bayramov və Cəlal Hüseynov heyətin ən geniş seçim imkanlarından biridir. Burada Abbasovun əlinin kifayət qədər geniş olduğunu görürük.
Müdafiənin mərkəzində Rəhman–Anton–Rahil–Cəlal–Elvin Bədəlov arasında seçim etmək mümkündür. Bu, əvvəlki dövrlə müqayisədə pis olmayan dərinlikdir.
Yarımmüdafiədə - Emin Mahmudov milli komandanın uzun illərdir əsas simalarından biridir. Pas, oyun quruculuğu və standart vəziyyətlərdə keyfiyyəti əsas üstünlükləridir. Amma yaş amili artıq nəzərə alınmalıdır. 34 yaşlı Mahmudov milli üçün hələ də çox vacib sima olsa da, onun üzərində bütün yarımmüdafiəni qurmaq uzunmüddətli həll deyil.
Bu baxımdan, Emil Səfərov, Abdulla Xaybulayev, Aleksey İsayev, Bədavi Hüseynov, Rəhim Sadıxov, Ceyhun Nuriyev, Mustafa Əhmədzadə, Ayxan Hüseynov, Edqar Adilxanov, Oruc Məmmədov, Rüfət Abdullazadə, Anatoli Nuriyev və Fərid Yusifli kimi gənc və fiziki baxımdan dinamik yarımmüdafiəçilər Abbasovun sistemində maraqlı alternativlərdir.
Hücum xətti – ən çox sual doğuran mövqedir. Mahir Emreli hazırkı heyətin ən diqqətçəkən hücumçularındandır. “Rakuv”da 2026/2027-ci illər mövsümünün ilk hissəsində ciddi oyun yükü alıb. Forvard Ekstraklasada 7 oyunda 573 dəqiqə, 3 qol və 1 assist. Konfrans Liqası ilə birlikdə mövsüm göstəricisi də yüksəkdir. Bu baxımdan o, hazırkı forma və oyun praktikası baxımından hücum xəttinin ən güclü arqumentlərindən biridir.
Heyətdə Vüsal İsgəndərli, Musa Qurbanlı və Renat Dadaşov da var. Burada əsas ziddiyyət potensialı yüksək olan hücumçuların, hazırda klublarında böyük oyun praktikasına malik olmamalarıdır.
HEYƏTİN ƏSAS GÜCLÜ TƏRƏFLƏRİ
Müdafiədə seçim sayı artıb
Anton, Rahil, Rəhman, Cəlal, Elvin Bədəlov, Bədavi kimi seçimlər mərkəzdə kifayət qədər alternativ yaradır.
“Sabah” faktoru
Azərbaycan çempionunun Çempionlar Liqasının əsas mərhələsinə qədər irəliləməsi milli üçün əhəmiyyətli üstünlükdür. Klubun bir neçə yerli futbolçusu Avropanın yüksək səviyyəli oyunlarında iştirak edib. “Sabah” özü də beş futbolçusunun A milliyə çağırıldığını açıqlayıb.
Legioner sayı və coğrafiyası
Anton Cənubi Koreyada, Toral Türkiyədə, Cəlal Rumıniyada, Rüfət İsraildə, Anatoli Macarıstanda, Vüsal Kosovoda, Mahir Polşada, Renat Ukraynada oynayır. Bu, milli futbolçularının müxtəlif futbol məktəblərində təcrübə toplaması baxımından müsbət amildir.
Mahir Emrelinin forması
Hazırkı heyətdə klub statistikası baxımından ən aydın müsbət göstəricilərdən birinə sahibdir.
Gəncləşmə
Rüfət Abbasov, Emil Səfərov, Abdulla Xaybulayev, Ceyhun Nuriyev, Ayxan Hüseynov, Edqar Adilxanov, Oruc Məmmədov, Rüfət Abdullazadə, Fərid Yusifli və Musa Qurbanlı kimi adların olması heyətin yalnız hazırkı nəticəyə deyil, növbəti illərə də hesablandığını göstərir.
HEYƏTİN ZƏİF VƏ PROBLEMLİ TƏRƏFLƏRİ
Hücumda stabil qol mənbəyi problemi
Mahir Emreli yaxşı formadadır. Lakin onun arxasında gələn hücumçuların cari mövsüm göstəriciləri eyni səviyyədə deyil.
Musa Qurbanlının oyun praktikası azdır, Renat Dadaşov yeni kluba keçib, Vüsal İsgəndərlinin cari mövsüm beynəlxalq statistikasında qol yoxdur.
Emin Mahmudovdan asılılıq
Mahmudov hələ keyfiyyətli oyun qurucusudur. Amma 34 yaşındadır. Ona alternativ kimi gənc futbolçuların hazırlanması zəruridir.
Bəzi yeni çağırışların oyun praktikası aşağıdır
Rəvan Mirzəmmədov, Emil Səfərov və Musa Qurbanlı buna nümunədir. Bu futbolçuların milli səviyyədə potensialı ola bilər, amma hazırkı klub oyunlarının sayı əsaslandırma baxımından sual yaradır.
Qapıda keçid dövrü
Emil Balayev artıq karyerasının sonrakı mərhələsindədir. Şahruddin Məhəmmədəliyevin bu dəfə heyətdən kənarda qalması ilə qapı xəttində yeni rəqabət yaranır.
AYXAN ABBASOV HANSI SİSTEMİ SEÇƏCƏK?
Heyətə baxanda bir neçə fərqli model mümkündür. Əsas məsələ budur. Heyət Abbasova bir neçə sistem imkanı verir, amma hücum xəttində hansı futbolçunun əsas qol silahına çevriləcəyi hələ aydın deyil.
Bu heyətin ən mühüm xüsusiyyəti “köhnə milli” ilə “yeni milli” arasında keçid yaratmasıdır.
Ən böyük potensial üstünlük müdafiədə və yarımmüdafiədə seçimlərin çoxluğu, əsas problem isə hücumda stabil qol istehsalının hələ tam formalaşmamasıdır.
Digər tərəfdən, Azərbaycanın D2 qrupunda olması heyətin qiymətləndirilməsində vacibdir. Burada rəqiblər Litva və Lixtenşteyndir və qrupun bütün oyunları altı yox, dörd qarşılaşmadan ibarətdir. UEFA qaydalarına görə D liqasında qrup qalibi növbəti liqaya yüksəlir; Azərbaycan üçün bu səbəbdən qarşıdakı oyunlar sadəcə heyəti sınaqdan keçirmək deyil, qrupun taleyinə birbaşa təsir edən rəsmi oyunlardır.
Ən maraqlı məqam isə Ayxan Abbasovun artıq sadəcə əvvəlki futbolçuları qorumaq yox, yeni milli nüvə yaratmaq mərhələsinə keçməsidir. Bu heyətin real gücü isə xüsusən Litva ilə iki oyunda və Lixtenşteynlə qarşılaşmada daha aydın görünəcək.
Namiq HUN
