Censon Batton sükanı ailəsi üçün buraxır
2009-cu il “Formula-1” çempionu, britaniyalı pilot Censon Batton karyerasının son yarışını nə vaxt keçirəcəyini açıqlayıb.
TodayPress TV xəbər verir ki, bu barədə BBC məlumat yayıb.
Batton bildirib ki, 2025-ci il Dünya Dözümlülük Çempionatının (WEC) son mərhələsi olan “Bəhreynin 8 saatı” yarışı onun peşəkar avtoidman karyerasındakı son çıxışı olacaq.
“Bu mənim son yarışım olacaq. Mənə hər zaman Bəhreyn xoş təsir bağışlayıb – əyləncəli trasdır və mən bundan maksimum zövq almağa çalışacam, çünki bu, karyeramın sonu olacaq. WEC-də JOTA komandası ilə vaxt keçirməkdən böyük zövq aldım, amma həyatım çox rəngarəngdir. 2026-cı ildə bu yarışa vaxt tapacağıma inanmıram. Bu nə komanda, nə də mənim üçün ədalətli olmaz”.
Qeyd edək ki, britaniyalı pilotun idmanı tərk etməsinin digər səbəbi ailəsi ilə bigə olmaq istəyidir. Battonun dörd və altı yaşında olan iki övladı var.
Namiq HUN
