Azərbaycanın gələcək potensialı var
“Azərbaycan yığması ilə oyundan həzz almaq istəyirik”. Fransa millisinin futbolçusu İbrahima Konatenin DÇ-2026-nın seçmə mərhələsi çərçivəsində Bakıda Azərbaycan yığmasına qarşı keçirəcəkləri oyundan öncə təşkil edilən mətbuat konfransında dediyi sözlər gerçək oldu. Onun nisbi mənada dediyi “bizi çətin oyun gözləyə bilər” sözləri də dəqiq oldu.
Bəli, millimiz Konate və dostlarını Fernandu Santuş dönəmində baş tutan ilk görüşdə təəccübləndirməyi bacarmışdı.
“Səmimi olacağam, birinci matçda çətinlik çəkdik. Bizim də Bakıda öz hədəflərimiz var. Bunun üçün mübarizə aparacağıq”- deyə Konate bildirmişdi.
Millimizlə oyundan xalla qayıtmaq istəyən "xoruz"lar istəklərinə çatdılar. Amma Ayxan Abbasov dönəmində bu uğur daha çətin mübarizədə əldə olundu. Fransızları şokdan Jan-Filipp Matetanın fərdi ustalığı çıxartdı. Sonrası necə oldu? Bunu əyani olaraq hamınız gördünüz.
Azərbaycan yığma komandası futbol oynamağı bacardığını bir daha göstərdi. Bunun bir daha şahidi olduq. Onuda gördük ki, keyfiyyətimiz bir yerə qədər çatır. Fransa yığması kimi Avropa nəhəngi ilə başabaş 17-ci dəqiqəyədək oynaya bildik. Bundan sonrasını isə millimiz gətirə bilmədi. Amma uğurlu gələcək gələcək.
Azərbaycan yığmasının baş məşqçisi Ayxan Abbasov da futbolçuların bu oyundakı çıxışının inam yaratdığını vurğuladı. O, komandanın bu matçla vacib mesaj verdiyini dedi:
“Bu oyunla bizim futbolçulara inam verdilər. Gələcək üçün ilham verdilər ki, hər kəslə mübarizə aparmaq olar”.
Bəli, onu ilk növbədə"dişimizə görə" olan Millətlər Liqası oyunlarında görəcəyik. Hazırlaşmaq lazımdır. İtirilmişləri qaytarmaq üçün heyətə Krivatsyuk, Emin, Rəhman, Bəhlul, Xəyal, Xaybullayev kimi milli nədi dərk edən futbolçular çağrılmalıdır. Milli komandaya ikinci dərəcə kimi baxanlar siyahıya salınmamalıdır.
Namiq HUN
