Hərbi möhlət, yoxsa “bəhanə yeri” ? - Doktorantlara XƏBƏRDARLIQ

“Hərbi vəzifə və hərbi xidmət haqqında” Qanuna əsasən, əyani təhsilalma formasında doktoranturada (adyunkturada) təhsil alan şəxslərə təhsillərini başa çatdıranadək müddətli həqiqi hərbi xidmətə çağırışdan möhlət verilir.

Bu imkanın bəzi gənclər tərəfindən hərbi xidmətdən yayınmaq üçün istifadə edilib-edilməməsi isə suallar yaradır.  

Mövzu ilə bağlı TodayPress TV-yə danışan təhsil eksperti Elçin Əfəndi bildirib ki, qanunvericiliyin verdiyi bu hüquq bəzən yanlış şərh olunur və bütün doktorantları eyni mövqedə göstərmək düzgün deyil.

Onun sözlərinə görə, bəzi hallarda bu imkandan sui-istifadə edənlər olsa da, bunu bütün oğlan tələbələrə aid etmək olmaz: 

"Doktorantura təhsili alanların əhəmiyyətli hissəsi məhz elmi tədqiqat aparmaq, ixtisasları üzrə dərinləşmək və elmi fəaliyyətlərini fasiləsiz şəkildə davam etdirmək istəyən şəxslərdir. Onlar üçün əsas məqsəd hərbi xidmətdən yayınmaq yox, elmi işlərini yarımçıq qoymamaqdır. Hətta elə gənclər var ki, hərbi xidməti əvvəlcə keçib, daha sonra elmi fəaliyyətə qayıtmağı üstün tuturlar. Bu da göstərir ki, doktorantura seçimi hər zaman möhlət məsələsi ilə bağlı deyil".

Təhsil eksperti vurğulayıb ki, hər ali təhsil məzunu doktoranturaya maraq göstərmir. Bəziləri bakalavr təhsili ilə kifayətlənir, bəziləri magistraturanı bitirdikdən sonra təhsili davam etdirmir. Doktorantura isə daha çox elmi istiqamətdə marağı və məqsədi olan şəxslərin seçimidir: 

"Bəli, müəyyən sayda gənc doktorantura təhsilini hərbi xidmətdən yayınmaq üçün bir vasitə kimi görə bilər. Lakin bu hallar ümumi mənzərəni əks etdirmir və böyük əksəriyyət üçün doktorantura sırf elmi fəaliyyətlə bağlı şüurlu seçimdir. Doktorantlara verilən hərbi möhlət hüququnun mövcudluğu avtomatik olaraq onun “bəhanə yeri” kimi dəyərləndirilməsi anlamına gəlmir və məsələyə fərdi yanaşmaq daha düzgün olardı", - deyə Elçin Əfəndi fikrini sonlandırıb.

Türkan İsgəndərli

TodayPress TV