Uitaker: "Çin Ukrayna münaqişəsini bir telefon zəngi ilə həll edə bilər"

Çin Rusiya Prezidenti Vladimir Putin-ə bir telefon zəngi etməklə Ukraynadakı münaqişəyə “sabah” son qoya bilər. 

TodayPress TV  "Blomberg"ə istinadən xəbər verir ki, bunu ABŞ-nin  NATO-dakı səfiri Metyu Uitaker Münhen Təhlükəsizlik Konfransında bildirib.

“Çin sabah Vladimir Putinə zəng edərək hərbi əməliyyatlara son qoya bilər. Həmçinin Rusiyaya ikili təyinatlı texnologiyaların satışını və Rusiya neft-qazının alışını dayandıra bilər”, – deyə Uitaker vurğulayıb.

Səfirin sözlərinə görə, Çin Ukraynadakı münaqişədə Rusiyanı “tam dəstəkləyir”.

O qeyd edib ki, hərbi əməliyyatlar başlayandan bəri Rusiya və Çin tərəfdaşlıqlarını daha da gücləndiriblər.

Uitaker iddia edib ki, Rusiya dronlar və digər hərbi texnika üçün zəruri hissə və komponentlərin tədarükündə Çindən asılıdır. Onun sözlərinə görə, Çin eyni zamanda Rusiya xam neftinin ən böyük alıcısıdır və bu səbəbdən Pekin böhranın həllində Moskvanın mövqeyinə təsir göstərə bilər.

Qeyd edək ki, fevralın 13-də Ukraynanın xarici işlər naziri Andrey Sibiqa Münhen Təhlükəsizlik Konfransı çərçivəsində Çinin xarici işlər naziri Vanq Yi ilə görüşdüyünü açıqlayıb. Daha sonra Vanq Yi Ukraynaya humanitar yardım göstərilməsi planlarını bəyan edib.

Yanvarın sonunda Çin Xarici İşlər Nazirliyinin sözçüsü Quo Ciakun bildirib ki, Çin tərəfləri gərginliyin azaldılması və eskalasiyanın qarşısının alınması istiqamətində addımlar atmağa çağırır.

Uitaker daha əvvəl ABŞ-nin Ukraynaya sülh əldə olunana qədər silah tədarükünü davam etdirəcəyini də bəyan etmişdi.

TodayPress TV

Jalə Rövşən