Süni intellektlə milyonlar oğurlanır - 7 ölkə hədəfdə -VİDEO
Hakerlər süni intellekt alətlərindən istifadə etməklə eyni vaxtda bir neçə ölkədə banklara, maliyyə şirkətlərinə və ödəniş sistemlərinə hücum edirlər.
TodayPress TV xəbər verir ki, bunu Ronald Karter "X" hesabında yazıb.
Məlumata görə, Cənubi Koreya, İtaliya, Hindistan, Yaponiya, Avstraliya və Latın Amerikası ölkələrində qeydə alınan insidentlər maliyyə sektorunda kibertəhlükəsizlik risklərinin artdığını göstərir.
Cənubi Koreyada hakerlərin Çin istehsalı olan süni intellekt alətindən istifadə edərək ən azı 7 maliyyə şirkətinin sistemlərinə daxil olduğu bildirilir. Hücumlar nəticəsində 68 min nəfərin məlumatlarının oğurlandığı qeyd olunur. Oktyabrın ortalarınadək 16 şirkətin kiberhücumlara məruz qaldığı, Daishin Securities şirkətində isə 38 490 müştərinin, o cümlədən bank hesabı nömrələrinin yer aldığı məlumatların sızdığı açıqlanıb.
Latın Amerikasında isə haker qrupunun Claude, Grok və Kimi süni intellekt modelləri əsasında işləyən agentlərdən istifadə edərək banklar və ödəniş şirkətləri də daxil olmaqla 400-dən çox hədəfə hücum etdiyi iddia olunur. Hücumçuların parolları ələ keçirərək müştərilərin bank hesablarına giriş əldə etdikləri bildirilir.
İtaliyada saxta "WhatsApp" mesajları və süni intellektlə klonlaşdırılmış səs vasitəsilə həyata keçirilən dələduzluq nəticəsində Intesa Sanpaolo bankının özəl bankçılıq bölməsinin 95 milyon avro köçürdüyü iddia edilir. Həmin məbləğin 36 milyon avrosunun hələ də tapılmadığı və kriptovalyutaya çevrildiyi bildirilir.
Hindistanda kiçik kredit təşkilatları iki ay ərzində təxminən 300 milyon rupi, yəni 31 milyon dollar itiriblər. Məlumata görə, 150 insident qeydə alınıb. Hakerlər bank sistemlərinə giriş məlumatlarını ələ keçirərək vəsaitləri saxta kredit əməliyyatları adı altında köçürüblər. Şirkətlərdən birinin iki dəfə hücuma məruz qaldığı qeyd olunur.
Kriptovalyuta sektorunda da ciddi itkilər qeydə alınıb. Bitget platformasının isti kriptovalyuta pul kisələrindən 351 milyon dolların çıxarıldığı, hadisə ilə bağlı Şimali Koreyalı hakerlərin şübhəli bilindiyi bildirilir.
Yaponiyada hakerlər GMO Internet şirkətinin valyuta ticarəti xidmətini hədəfə alaraq 50 milyon dollar dəyərində kriptovalyuta tələb ediblər. Hadisədən sonra ölkənin baş nazirinin kibertəhlükələrə qarşı təcili tədbirlər paketinin hazırlanacağını vəd etdiyi bildirilir.
Avstraliyada isə tənzimləyici qurum süni intellektdən istifadə edilən hücumların ümumi dəyəri 4,5 trilyon Avstraliya dollarını ötən pensiya əmanətləri üçün ciddi risk yaratdığı barədə xəbərdarlıq edib. Hökumətin kibertəhlükəsizliklə bağlı xəbərdarlıqlarının bir il ərzində 80 faiz artdığı qeyd olunur.
Mütəxəssislərin diqqət çəkdiyi əsas təhlükələrdən biri süni intellekt vasitəsilə kiberhücum alətlərinin daha əlçatan olmasıdır. Nisbətən zəif müdafiə sistemlərinə malik kiçik maliyyə şirkətləri hakerlər üçün asan hədəfə çevrilir. Oğurlanmış vəsaitlər isə qısa müddətdə müxtəlif bank hesabları, vasitəçi hesablar və kriptovalyuta əməliyyatları üzərindən başqa ölkələrə köçürülə bilər.
Artan risklər fonunda beynəlxalq maliyyə qurumları da tədbirlər görməyə başlayıblar. G7 ölkələrinin banklara qarşı süni intellekt əsaslı hücum ssenarilərinin simulyasiyasını əhatə edən təlimlərin keçirilməsi barədə razılığa gəldiyi bildirilir. Avropa Mərkəzi Bankının isə avrozona banklarına müdafiə planlarını təqdim etmək üçün dörd ay vaxt verdiyi qeyd olunur.
Baş verənlər süni intellektin maliyyə sektorunda yaratdığı yeni təhlükələrin artıq ayrı-ayrı şirkətlərin problemi olmadığını göstərir. Kibercinayətkarların daha mürəkkəb hücumları daha sürətli və genişmiqyaslı həyata keçirə bilməsi bankların, tənzimləyici qurumların və müştərilərin təhlükəsizlik tədbirlərini gücləndirməsini zəruri edir.
Jalə Rövşən
