Rusiyada gərgin həftə: 349 mandat, yüzlərlə dron və cəbhədə yeni addımlar
Həftə ərzində Rusiya mediasının diqqət mərkəzində Dövlət Dumasına seçkilərin yekunları, Ukrayna tərəfindən rus regionlarına yönəlmiş genişmiqyaslı dron hücumları və hərbi-diplomatik hadisələr dayanıb.
TodayPress TV xəbər verir ki, seçkilərin rəsmi yekunları açıqlanıb.
Mərkəzi Seçki Komissiyasının məlumatına görə, “Vahid Rusiya” partiyası rekord sayda – 349 mandat qazanıb və yeni çağırışda 20-dən çox komitəyə rəhbərlik edəcək. Prezident Vladimir Putin seçicilərə təşəkkür edərək bildirib ki, rəqiblər seçki prosesini pozmaq cəhdlərində uğursuz olublar. Putin Sankt-Peterburqda jurnalistlərlə söhbətində Ukrayna ilə danışıqlar mövzusuna da toxunub. O qeyd edib ki, bütün sülh təklifləri masada qalır, lakin Moskva növbəti addımları yalnız öz maraqlarına əsasən müəyyənləşdirəcək. Putin Kiyevin seçkilər zamanı Moskvaya və səsvermə məntəqələrinə hücumlar təşkil etdiyini iddia edib.
Bu tarixlərdə Ukrayna Silahlı Qüvvələrinin dron hücumları xüsusi diqqət çəkib. Müdafiə Nazirliyinin məlumatına görə, 25-26 sentyabr gecəsi 645-dən çox dron məhv edilib. Hücumlar Astraxan, Belgorod, Bryansk, Voronej, Kursk, Rostov, Tula vilayətləri, Krasnodar və Stavropol diyarları, Krım və digər regionları əhatə edib. Krasnodar diyarında üç nəfər həlak olub, iki nəfər yaralanıb, sənaye obyektlərində yanğınlar baş verib. Rostov vilayətində isə beş nəfər, o cümlədən bir uşaq xəsarət alıb. Bəzi günlərdə sökülən dronların sayı 600-ə yaxınlaşıb, aeroportlarda müvəqqəti məhdudiyyətlər tətbiq olunub.
Eyni zamanda Rusiya ordusu Xarkov və Sumı istiqamətlərində irəliləyişini davam etdirib. Müdafiə Nazirliyi Petropavlovsk, Lozovaya və Maryino yaşayış məntəqələrinin nəzarət altına alındığını bildirib. Ukrayna ərazisindəki hərbi və infrastruktur obyektlərinə zərbələr endirilib. Xarici İşlər Naziri Sergey Lavrov BMT Baş Assambleyasında çıxış edərək Avropanı sülh danışıqlarını pozmaqda günahlandırıb və Almaniya Xarici İşlər Naziri ilə görüşüb.
Digər mühüm hadisələr arasında KTMT-nin “Qarşılıqlı əlaqə-2026”, “Axtarış-2026” və “Eşelon-2026” təlimləri, Maliyyə Nazirliyinin büdcə paketi təklifi və andlılar məhkəməsinin islahatı layihəsi də yer alıb.
Türkan İsgəndərli
