Polo qasırğası okeanı hərəkətə gətirdi

Sakit okeanın şərq hissəsində “Polo” qasırğası 24 saat ərzində sürətlə güclənərək 5-ci kateqoriyaya çatıb.

TodayPress TV xəbər verir ki, “Polo” qasırğası sentyabrın 21-də Meksikanın Sakit okean sahilləri yaxınlığında tropik fırtına kimi formalaşıb.

ABŞ Milli Qasırğa Mərkəzinin məlumatına görə, qasırğa növbəti gün ərzində son dərəcə sürətlə güclənib və 5-ci kateqoriyaya yüksəlib.

Sentyabrın 22-də “Polo”nun maksimal sabit külək sürəti saatda 285 kilometrə çatıb, mərkəzdə atmosfer təzyiqi isə 892 millibaradək düşüb. Bu göstəricilər qasırğanın son dərəcə güclü olduğunu göstərir.

Qasırğa Meksikanın cənub-qərb sahillərindən təxminən 335 kilometr məsafədə yerləşib və demək olar ki, hərəkətsiz qalıb. ABŞ Milli Qasırğa Mərkəzi “Polo”nun sonrakı günlərdə əsasən qərb-şimal-qərb istiqamətində hərəkət edəcəyini bildirib.

Qeyd edək ki, “Polo” 2026-cı ildə indiyədək müşahidə olunan ən güclü qasırğa kimi qiymətləndirilir.

Qiymət Mahir