Pakistanda daşqınlar nəticəsində ölənlərin sayı artdı

Pakistanda musson yağışlarının səbəb olduğu daşqınlar və torpaq sürüşmələri nəticəsində ölənlərin sayı 400 nəfərə çatıb.

TodayPress TV xəbər verir ki, bu barədə "AFP" məlumat yayıb.

Belə ki, son sutka ərzində ölkənin cənub-qərbindəki Sind əyalətinin 20 sakini, o cümlədən regionun paytaxtı Kəraçidə 8 nəfər ölüb. Əhalisi təxminən 15 milyon nəfərə çatan meqapolisin əksər əraziləri su altında qalıb, sənaye müəssisələrinin, dəniz limanının və ictimai nəqliyyatın işi iflic olub.

Ən çox ölüm halları (360-dan çox) ölkənin şimal-qərbində yerləşən Hayber Paxtunxva əyalətində qeydə alınıb. Daşqın 349 yaşayış binasını tamamilə dağıdıb, 450-yə yaxın binaya isə ziyan dəyib.

Bir çox ərazilərdə nəqliyyat infrastrukturu dağıdılıb, mobil rabitədə fasilələr yaranıb. Hakimiyyət təbii fəlakət zonasından təxliyə edilənlər üçün 456 müvəqqəti düşərgə yaradıb.

Hayber-Paxtunxvada fövqəladə vəziyyət rejimi qüvvədədir, xilasetmə əməliyyatlarına 6 min hərbçi və könüllü cəlb olunub.

Qeyd edək ki, Pakistanda musson mövsümü adətən iyundan sentyabr ayına qədər davam edir və özüylə kənd təsərrüfatı üçün həyati əhəmiyyət kəsb edən, lakin tez-tez daşqınlara və digər təbii fəlakətlərə səbəb olan güclü yağışlar gətirir. Sinoptiklər leysanların sentyabrın ortalarına qədər davam edəcəyini proqnozlaşdırırlar.