Lekornu hələ də etimadsızlıq riski ilə üz-üzədir
“Odoxa-Backbone Consulting” şirkətinin sorğusuna əsasən, fransızların böyük əksəriyyəti yeni Baş nazir Sebastian Lekornu və onun formalaşdırdığı hökumətə etimadsızlıq göstərir.
TodayPress TV Fransa KİV-ə istinadən xəbər verir ki, fransızların 62%-i bu təyinatdan narazıdır.
Fransızlar Lekornünü fərdi xüsusiyyətlərinə görə bəyənsələr də, onu baş nazir kimi qəbul etmirlər. Sorğuda iştirak edənlərin 44%-i onun haqqında müsbət fikir bildirib. Onun televiziya vasitəsilə verdiyi səmimi istefa açıqlaması da Lekornüya ictimai rəğbət qazandırıb. Buna baxmayaraq, fransızların 61%-i hesab edir ki, o, yaxşı baş nazir deyil.
Yeni formalaşan hökumət isə vəziyyəti yaxşılaşdırmaq əvəzinə, daha da pisləşdirir. Respondentlərin 72%-i bu hökumətin onların gözləntilərinə uyğun olmadığını düşünür. 67%-i isə siyasi dəyişiklik vədinin yerinə yetirilmədiyini qeyd edir.
Hökumətin kiçik heyətli olacağı bəyan edilsə də, yeni kabinetdə 34 üzv yer alıb. Nəticədə, fransızların 73%-i bu hökumətin uğur qazanacağına, 74%-i isə 2027-ci ilə qədər davam edəcəyinə inanmır.
Etimadsızlıq səsverməsi ictimaiyyətdə kəskin qütbləşməyə səbəb olur: 52% lehinə, 47% əleyhinədir. Bu fərq xalqın narazı olduğu qədər yorğun olduğunu da göstərir. Əksəriyyət hökumətin cəzalandırılmasını istəsə də, az qala yarısı bunun siyasi böhranı daha da dərinləşdirəcəyindən qorxur. Fransızların 80%-i böhranın artıq iqtisadi təsirlərinin olduğunu düşünür.
Pensiya islahatının dayandırılması qərarı müvəqqəti olaraq gərginliyi azaldıb. Bu da sosialist seçicilər arasında etimadsızlığa qarşı çıxanların sayını artırıb.
Ən diqqətçəkən nəticələrdən biri odur ki, əgər Lekornü hökumətinə etimadsızlıq göstərilərsə, fransızların 83%-i bunun ciddi siyasi nəticələrinin olacağını düşünürlər. Fransızların 50%-i Emmanuel Makronun istefasını, 33%-i isə parlamentin buraxılmasını istəyir. Yalnız 16%-i yeni Baş nazir təyin olunmasının çıxış yolu ola biləcəyini düşünür.
Jalə Rövşən
