İsrail Livanın cənubuna zərbə endirdi: Ölən və yaralananlar var

İsrail Hərbi Hava Qüvvələrinə məxsus təyyarələr “Hizbullah” döyüşçülərinin pilotsuz uçuş aparatları buraxmasına cavab olaraq Livanın cənubundakı yerüstü hədəflərə zərbələr endirib.

TodayPress TV xəbər verir ki, bu barədə "Al Mayadeen" telekanalı məlumat yayıb.

Məlumata görə, Nəbatiyyə vilayətinin Ərəb-Salim şəhərinə endirilən zərbə nəticəsində azı iki mülki şəxs həlak olub.

Hava hücumu, həmçinin Kfar-Rumman bölgəsinə həyata keçirilib, burada beş nəfər yaralanıb.

Nəbatiyyə şəhərində hava zərbəsi zamanı bir neçə raketin atıldığı Gandur xəstəxanası tamamilə dağıdılıb. Şəhərin mərkəzi hissəsində yerləşən Rəhəbət məhəlləsində bir neçə bina zədələnib. Sakinlər arasında xəsarət alanlar var.

Xatırladaq ki, bundan əvvəl İsrail hərbi nümayəndəsi “Hizbullah” döyüşçülərinin təhlükəsizlik zonasında İsrail mövqelərinə partlayıcı ilə təchiz edilmiş iki pilotsuz uçuş aparatı buraxaraq atəşkəs rejimini pozduqlarını iddia edib.

Ordu komandanlığı Livanın cənubundakı əhaliyə cavab hava zərbələrinin endiriləcəyi əraziləri tərk etməyin zəruriliyi barədə xəbərdarlıq edib.

Aysel Mətləb