İranın Hörmüz boğazının açılması üçün şərtləri

İran Hörmüz boğazında ödənişin Çin yuanı ilə həyata keçirilməsi şərtilə neftin nəqlinə icazə verməyə hazırdır.

TodayPress TV xəbər verir ki, bu barədə "CNN" telekanalı mənbələrə istinadla məlumat yayıb.

Telekanal qeyd edir ki, bu addım İranın dünyanın əsas neft arteriyası üzərində nəzarəti ələ keçirmək üçün yeni planının bir hissəsidir.

Tehran bu qərarı boğazdan neft tankerlərinin axınını tənzimləmək üçün planlaşdırır.

Hazırda beynəlxalq bazarlarda neft ticarəti əsasən ABŞ dolları ilə aparılır, yeganə istisna Rusiya neftidir ki, burada ticarət rubl və ya yuanla həyata keçirilir.

ABŞ və İsrailin 28 fevraldan etibarən İrana qarşı hava hücumları başlamasından sonra Hörmüz boğazından neftin nəqli demək olar ki, tam dayanıb. 4 martda Tehran boğazın bağlandığını rəsmi şəkildə elan edib.

Qeyd olunur ki, Yaxın Şərqdəki gərginlikdən əvvəl Hörmüz boğazından gündə təxminən 20 milyon barel neft keçirdi ki, bu da qlobal ixracatın 20-25%-ni təşkil edirdi.

Türkan İsgəndərli

TodayPress TV